ໜ່ວຍຊາວໜຸ່ມກົມການເງິນຕ່າງປະເທດ ແລະ ຄຸ້ມຄອງໜີ້ສິນ ຢ້ຽມຊົມຫໍມູນເຊື້ອກະຊວງການເງິນ

ເພື່ອເປັນການສ້າງຂະບວນການຊົມເຊີຍກອງປະຊຸມຂະແໜງການເງິນທົ່ວປະເທດທີ່ໄດ້ຈັດຂຶ້ນໃນລະຫວ່າງວັນທີ 4-5 ກຸມພາ 2021ນີ້. ໃນວັນທີ 3 ກຸມພາ 2021 ໜ່ວຍຊາວໜຸ່ມກົມການເງິນຕ່າງປະເທດ ແລະ ຄຸ້ມຄອງໜີ້ສິນ, ໂດຍການນໍາພາຂອງສະຫາຍ ສຸກຂີວັນ ດວງດີ ເລຂາໜ່ວຍຊາວໜຸ່ມກົມການເງິນຕ່າງປະເທດ ແລະ ຄຸ້ມຄອງໜີ້ສິນ ພ້ອມດ້ວຍຄະນະໄດ້ເຂົ້າຢ້ຽມຊົມຫໍມູນເຊື້ອກະຊວງການເງິນ.

ການເຂົ້າຢ້ຽມຊົມຫໍມູນເຊື້ອໃນຄັ້ງນີ້ກໍເພື່ອສຶກສາຂໍ້ມູນກ່ຽວກັບມູນເຊື້ອການເຄື່ອນໄຫວວຽກງານ ຂອງຂະແໜງການເງິນ, ນັບແຕ່ມື້ສ້າງຕັ້ງຈົນເຖິງປັດຈຸບັນຢ້ຽມຊົມຮູບພາບ-ວີດີໂອການເຄື່ອນໄຫວຂອງການນໍາຂອງຂະ  ແໜງການເງິນ, ແຕ່ລະສະໄໝໃນເມື່ອກ່ອນ, ໂຄງປະກອບການຈັດຕັ້ງຮູບການເຄື່ອນໄຫວວຽກງານວິຊາສະເພາະ, ບັນດາມະຕິຄໍາສັ່ງກົດໝາຍລະບຽບການ ທີ່ເປັນເຄື່ອງມືຮັບໃຊ້ວຽກງານວິຊາສະເພາະໃນແຕ່ລະດ້ານຂອງຂະແໜງ ການເງິນ, ພ້ອມທັງບັນດາຜົນງານຜົນສໍາເລັດຕ່າງໆ, ຢ້ຽມຊົມແຜນຜັງຈໍາລອງສະຖິຕິສະພາບງົບປະມານແຕ່ລະໄລຍະ, ປື້ມສະໜຸດຕ່າງໆທີ່ໄດ້ຮັບການຮ່ວມມືຈາກຫຼາຍພາກສ່ວນເປັນຕົ້ນແມ່ນ: ບັນດາກົມອ້ອມຂ້າງກະຊວງການເງິນທີ່ໄດ້ສະໜອງບັນດາເອກະສານ, ນິຕິກຳ,  ຫຼຽນກາ ຫຼຽນໄຊ ແລະ ຂອງທີ່ລະນຶກຕ່າງໆ.

ພ້ອມກັນນັ້ນ, ໄດ້ຮັບການຮ່ວມມືຈາກອົງການຈັດຕັ້ງອ້ອມຂ້າງກະຊວງເປັນຕົ້ນແມ່ນກົມສຳເນົາເອກະສານແຫ່ງຊາດກະຊວງພາຍໃນ ທີ່ສະໜອງບັນດາເອກະສານນິຕິກຳແຕ່ອາດີດຈົນເຖິງປັດຈຸບັນເພື່ອເປັນຂໍ້ມູນໃຫ້ຄົນຮຸ່ນຫຼັງໄດ້ສຶກສາຮ່ຳຮຽນ.

ທັງນີ້, ກໍເພື່ອໃຫ້ສະມາຊິກຊາວໜຸ່ມກົມການເງິນຕ່າງປະເທດ ແລະ ຄຸ້ມຄອງໜີ້ສິນທຸກຄົນໄດ້ຮັບຮູ້ເຂົ້າໃຈ ແລະ ນໍາເອົາບົດຮຽນການເຄື່ອນໄຫວຂອງການນໍາໃນເມື່ອກ່ອນມາເປັນແບບຢ່າງໃນການພັດທະນາຕົນເອງ ພັດ ທະນາວຽກງານໃຫ້ດີຂຶ້ນເປັນກ້າວໆ.

ພາບ/ຂ່າວ:

ຂ່າວ: ອາພັດສະລາ ຈັນທະວົງ

ວັນທີອອກຂ່າວ:

09/02/2021

ວັນທີເກິດຂ່າວ:

03/02/2021

Close Menu
Top