ສໍາເລັດຊຸດຝຶກອົບຮົມໄລຍະສັ້ນ ວຽກງານກວດກາທົ່ວປະເທດ

ໃນວັນທີ 13 ພະຈິກ 2020 ທີ່ສະຖາບັນເສດຖະກິດ-ການເງິນ, ໄດ້ຈັດພິທີປິດຊຸດຝຶກອົບຮົມໄລຍະສັ້ນ ວຽກງານກວດກາໃຫ້ແກ່ພະນັກງານຂະແໜງກວດກາທົ່ວປະເທດປະຈໍາປີ 2020 ໂດຍການເຂົ້າຮ່ວມຂອງທ່ານ ບຸນໂຈມ ອຸບົນປະເສີດ ຮອງລັດຖະມົນຕີກະຊວງການເງິນ,ມີທ່ານ ອຸບັນ ສຸພິດາ ຫົວໜ້າກົມກວດກາ, ມີບັນຫົວໜ້າຮອງຫົວໜ້າສະຖາບັນເສດຖະກິດ-ການເງິນ, ຕາງໜ້າຈາກກົມຈັດຕັ້ງ ແລະ ພະນັກງານ, ຫ້ອງການກະຊວງ, ກົມພາສີ, ກົມສ່ວຍສາອາກອນ, ຄັງເງິນແຫ່ງຊາດ, ກົມງົບປະມານແຫ່ງລັດ, ພ້ອມດ້ວຍນັກວິທະຍາກອນ,ນັກສໍາມະນາກອນ ແລະ ພາກສ່ວນທີ່ກ່ຽວຂ້ອງເຂົ້າຮ່ວມ.

ໂອກາດດັ່ງກ່າວ, ທ່ານ ອຸໄທ ອິນທິລາດ ຮອງຫົວໜ້າກົມຈັດຕັ້ງ ແລະ ພະນັກງານ ໄດ້ລາຍງານໃຫ້ຮູ້ຜົນສໍາເລັດຊຸດຝຶກອົບຮົມວຽກງານກວດກາໃຫ້ແກ່ພະນັກງານຂະແໜງກວດກາທົ່ວປະເທດ ປະຈໍາປີ 2020 ໃນຄັ້ງນີ້ ແມ່ນເປັນການປະຕິບັດຕາມທິດຊີ້ນໍາຂອງຄະນະພັກຄະນະນໍາກະຊວງການເງິນ, ຈຶ່ງໄດ້ເປີດຊຸດຝຶກອົບຮົມວຽກງານກວດກາໃຫ້ແກ່ພະນັກງານຂະແໜງກວດກາ, ກະຊວງການເງິນປະຈໍາປີ 2020 ຂຶ້ນແຕ່ວັນທີ 12 ຕຸລາ 13 ພະຈິກ 2020, ໃຊ້ເວລາຮຽນທັງໝົດ 25 ວັນ ລັດຖະການມີນັກສໍາມະນາກອນເຂົ້າຮ່ວມຕົວຈິງ 56 ທ່ານ, ຍິງ 16 ທ່ານ, ໃນນັ້ນ, ມີນັກສໍາມະນາກອນມາຈາກກົມກວດກາ ແລະ ຂະແໜງກວດກາທ້ອງຖິ່ນໃນຂອບເຂດທົ່ວປະເທດ ແລະ ກົມກວດກາກວດການຂອງກະຊວງປ້ອງກັນຄວາມສະຫງົບ 01 ທ່ານ ແລະ ໄດ້ສໍາເລັດລົງໃນວັນທີ 13 ພະຈິກ 2020.

 

ສໍາລັບເນື້ອໃນທີ່ນໍາມາຝຶກອົບຮົມຄັ້ງນີ້ປະກອບມີ: ບັນຊີແຫ່ງລັດ, ບັນຊີວິສາຫະກິດ, ວຽກງານກວດກາພາສີ (ວຽກງານກວດສອບຫຼັງການແຈ້ງພາສີ), ວຽກງານກວດກາອາກອນ, ວຽກງານກວດກາ. ໃນນັ້ນ, ວຽກງານກວດກາພັກ, ວຽກງານກວດກາລັດ, ວຽກງານກວດກາຕ້ານການສໍ້ລາດບັງຫຼວງ (ລົງເລິກວຽກງານສືບສວນສອບສວນ) ແລະ ວຽກງານຕິດຕາມ ແລະ ແກ້ຜົນການກວດກາ

ໂອກາດດັ່ງກ່າວ, ທ່ານ ບຸນໂຈມ ອຸບົນປະເສີດ ໃຫ້ກຽດໂອ້ລົມຕໍ່ຊຸດຝຶກອົບຮົມເພື່ອປະກອບສ່ວນບໍາລຸງສ້າງ ແລະ ພັດທະນາຊັບພະຍາກອນມະນຸດຂອງຂະແຫນງກວດກາກະຊວງການເງິນໃຫ້ມີຄວາມເຂັ້ມແຂງນັບມື້ນັບ ມີຄຸນນະພາບເປັນກໍາລັງແຮງຂອງຊາດປະກອບສ່ວນເຂົ້າໃນການພັດທະນາ, ວຽກງານກວດກາແມ່ນໜຶ່ງໃນພາລະບົດບາດການນໍາພາຂອງພັກ ແລະ ເປັນຂອດຕັດສິນຊີ້ຂາດ ຂອງວຽກງານການຊີ້ນໍານໍາພາເຖິງການປະຕິບັດໜ້າທີ່ວຽກງານໃຫ້ຖືກຕ້ອງຕາມລະບຽບຫຼັກການແນວທາງນະໂຍບາຍ ຫຼື ຖືກຕ້ອງຕາມກົດໝາຍວາງອອກທຸກຂັ້ນຕອນ.  

ສະນັ້ນ, ພະນັກງານທີ່ເຮັດໜ້າທີ່ກວດກາຕ້ອງມີຄວາມເຂົ້າໃຈທີ່ຖືກຕ້ອງເປັນເອກະພາບຕໍ່ກັບວຽກງານກວດກາໃນໄລຍະໃໝ່ຕ້ອງບຸກທະລຸທາງດ້ານຈິນຕະນາການ ແລະ ການກະທໍາ, ຕ້ອງເຂົ້າໃຈວ່າວຽກງານກວດກາ ເປັນການກວດກາຄືນຄວາມຖືກຕ້ອງ ສໍາລັບການປະຕິບັດໜ້າທີ່ຂອງ ພະນັກງານເປັນໄປຕາມທີ່ໄດ້ກໍານົດໄວ້ໃນລະບຽບການ ແລະ ຂັ້ນຕອນຂອງກົດໝາຍທຸກປະການ; ການກວດກາຕ້ອງປະຕິບັດຢ່າງເປັນລະບົບຂັ້ນເທິງກວດກາຂັ້ນລຸ່ມ ແລະ ຂັ້ນລຸ່ມມີສ່ວນຮ່ວມໃນການຕິດຕາມ ແລະ ສະເໜີຄວາມຄິດເຫັນຕໍ່ຂັ້ນເທິງ; ການປະຕິບັດຜົນການກວດກາຕ້ອງປະສານສົມທົບກັບຄະນະພັກ, ອົງການປົກຄອງແຕ່ລະຂັ້ນຕໍ່ກັບການຕົກລົງແກ້ໄຂຜົນຂອງການກວດ ກາໃຫ້ເຂັ້ມງວດ, ສັກສິດຕາມກົດລະບຽບຂອງພັກ ແລະ ກົດໝາຍຂອງລັດ.

ພາບ/ຂ່າວ:

ຂ່າວ: ອາພັດສະລາ

ວັນທີອອກຂ່າວ:

17/11/2020

ວັນທີເກິດຂ່າວ:

13/11/2020

Close Menu
Top