ພະແນກການເງິນ ນະຄອນຫຼວງວຽງຈັນ ປາຖະກະຖາວັນປະກາດເອກະລາດ 12 ຕຸລາ

       ໃນວັນທີ 16 ຕຸລາ 2020, ພະແນກການເງິນ ນະຄອນຫຼວງວຽງຈັນ ໄດ້ຈັດປາຖະກະຖາ ເລົ່າຄືນມູນເຊື້ອ ເນື່ອງໃນໂອກາດວັນປະກາດເອກະລາດ 12 ຕຸລາ ຄົບຮອບ 75 ປີ ຂຶ້ນທີ່ພະແນກການເງິນ ນະຄອນຫຼວງວຽງຈັນ, ໂດຍການປາຖະກະຖາ ຂອງທ່ານ ພູວົງ ວົງຄຳຊາວ ຫົວໜ້າຄະນະໂຄສະນາອົບຮົມ ນວ, ມີທ່ານ ສີສຸພັນ ໄຊປັນຍາ ຮອງຫົວໜ້າພະແນກການເງິນ ນະຄອນຫຼວງວຽງຈັນ, ຄະນະພັກ, ຄະນະນຳຂອງ 3 ຂະແໜງສາຍຕັ້ງ, ຫົວໜ້າ-ຮອງຫົວໜ້າຂະແໜງອ້ອມຂ້າງ ພະແນກການເງິນ, ຕະຫຼອດຮອດ ສະມາຊິກພັກ-ພະນັກງານ ຫຼັກແຫຼ່ງ ຂອງຂະແໜງການເງິນ ນະຄອນຫຼວງວຽງຈັນ ເຂົ້າຮ່ວມ. 

       ໃນພິທີດັ່ງກ່າວ, ທ່ານ ພູວົງ ວົງຄຳຊາວ ໄດ້ເລົ່າເຖິງມູນເຊື້ອຜົນງານ ຂອງຊາດ-ຂອງພັກ ກ່ຽວກັບວັນປະກາດເອກະລາດ 12 ຕຸລາ ຄົບຮອບ 75 ປີ (12 ຕຸລາ 1945-12 ຕຸລາ 2020) ທີ່ມີຄວາມໝາຍຄວາມສໍາຄັນກ່ຽວກັບມູນເຊື້ອຜົນງານ ແລະ ຄວາມເປັນມາຂອງປະຫວັດສາດກ່ອນໜ້ານີ້ຫຼາຍສິບປີ ຄືວັນ 12 ຕຸລາ 1945 ໄດ້ມີການເຕົ້າ ໂຮມຊຸມນຸມໃຫຍ່ຢູ່ທີ່ວຽງຈັນ ເພື່ອປະກາດຄວາມເປັນເອກະລາດ ຂອງຊາດລາວເຮົາ ເປັນຄັ້ງທຳອິດຈາກແອກປົກຄອງຂອງພວກລ່າເມືອງຂຶ້ນ ແລະ ພວກຮຸກຮານຕ່າງຊາດ ວັນດັ່ງກ່າວນັ້ນໄດ້ເປັນຂີດໝາຍແຫ່ງໄຊຊະນະຂອງການຕໍ່ສູ້ອັນພິລະອາດຫານ, ດ້ວຍຄວາມສາມັກຄີ ແລະ ການເສຍສະຫຼະອັນໃຫຍ່ຫຼວງຂອງກອງທັບ ແລະ ປະຊາຊົນເຮົາພາຍໃຕ້ການນຳພາຂອງພັກປະຊາຊົນປະຕິວັດລາວ, ເພື່ອສືບຕໍ່ເສີມຂະຫຍາຍມູນເຊື້ອ 12 ຕຸລາມະຫາໄຊ ຄະນະພັກ-ຄະນະນຳທຸກຂັ້ນ ແມ່ນໄດ້ເອົາໃຈໃສ່ໂຄສະນາສຶກສາອົບຮົມການເມືອງ-ແນວຄິດຂອງພະນັກງານສະມາຊິກພັກ ແລະ ປະຊາຊົນບັນດາຊັ້ນຄົນທີ່ຂຶ້ນກັບການນຳພາ-ຄຸ້ມຄອງຂອງຕົນໃຫ້ເຊີດຊູນໍ້າໃຈຮັກຊາດ ຕິດພັນກັບການຊຸກຍູ້ການພັດທະນາໄດ້ດຳເນີນໄປຢ່າງຕັ້ງໜ້າ ແລະ ເປັນຂະບວນການຕໍ່ເນື່ອງ. 

ທັງນີ້, ກໍ່ເພື່ອເປັນການສຶກສາອົບຮົມການເມືອງ-ແນວຄິດໃຫ້ຖັນແຖວພະນັກງານ-ລັດຖະກອນສະມາຊິກພັກກໍ່ຄືພະນັກງານທົ່ວຂະແໜງການເງິນ ນວ ໄດ້ຮັບຮູ້, ເຊື່ອມຊຶມ ແລະ ກຳແໜ້ນຢ່າງເລິກເຊິ່ງກ່ຽວກັບມູນເຊື້ອຜົນງານຂອງຊາດຂອງພັກເປັນຕົ້ນ: ແມ່ນວັນປະກາດເອກະລາດ 12 ຕຸລາ ທີ່ເປັນຂີດໝາຍສຳຄັນໃນຂະບວນການຕໍ່ສູ້ກູ້ຊາດເພື່ອຍືດເອົາເອກກະລາດ, ອຳນາດອະທິປະໄຕ ແລະ ຜືນແຜ່ນດິນອັນຄົບຖ້ວນມາສູ່ປະເທດຊາດ ແລະ ປະຊາຊົນລາວບັນດາເຜົ່າຢ່າງມີໄຊ ແລະ ໃຫ້ສາມາດນຳເອົາບົດຮຽນໃນການເຄື່ອນໄຫວ ໃນໄລຍະຜ່ານມາ ເປັນແບບແຜນໝູນໃຊ້ເຂົ້າໃນການປະຕິບັດໜ້າທີ່ວຽກງານຂອງຕົນໃຫ້ໄດ້ຮັບຜົນສຳເລັດຕາມຄາດໝາຍທີ່ວາງໄວ້.

ພາບ/ຂ່າວ:

ພາບ-ຂ່າວ: ອາພັດສະລາ+ພຸດສະໄໝ

ວັນທີອອກຂ່າວ:

28/10/2020

ວັນທີເກິດຂ່າວ:

16/10/2020

Close Menu
Top