ທາບທາມບຸກຄະລາກອນ ຮອບທີ II ຄະນະບໍລິຫານງານພັກ ກະຊວງການເງິນ

ໃນວັນທີ 24 ກັນຍາ 2020 ທ່ີ່ີຫໍປະຊຸມແຫ່ງຊາດ ນະຄອນຫຼວງວຽງຈັນ, ໄດ້ຈັດກອງປະຊຸມທາບທາມບຸກຄະລາກອນ ຄະນະບໍລິຫານງານພັກກະຊວງການເງິນ ຮອບທີ II  ໂດຍການເປັນປະທານຂອງສະຫາຍ ສົມດີ ດວງດີ ກໍາມະການສູນກາງພັກ ເລຂາຄະນະບໍລິຫານງານພັກກະຊວງ ຮອງນາຍົກລັດຖະມົນຕີ ລັດຖະມົນຕີກະຊວງການເງິນ, ມີສະຫາຍ ວັນໄຊ ຟອງສະຫວັນ ຮອງເລຂາຄະນະພັກ, ຮອງຫົວໜ້າຄະນະຈັດຕັ້ງສູນກາງພັກ, ສະຫາຍ ບຸນໂຈມ ອຸບົນປະເສີດ ຮອງເລຂາຄະນະບໍລິຫານງານພັກກະຊວງ ປະທານກວດກາຄະນະບໍລິຫານງານພັກ ຮອງລັດ ຖະມົນຕີກະຊວງການເງິນ, ສະຫາຍ ບຸນເຫຼືອ ສິນໄຊວໍຣະວົງ ຄະນະບໍລິຫານພັກກະຊວງ ຮອງລັດຖະມົນຕີກະຊວງການເງິນ, ມີບັນດາສະຫາຍໃນຄະນະບໍລິຫານງານພັກ, ເລຂາໜ່ວຍພັກຮາກຖານ, ເລຂາໜ່ວຍພັກ, ເລຂາໜ່ວຍພັກທີ່ຂຶ້ນກັບຄະນະພັກຮາກຖານ, ສະມາຊິກພັກສົມບູນເຂົ້າຮ່ວມ.

ໃນກອງປະຊຸມ ສະຫາຍ ວັນໄຊ ຟອງສະຫວັນ ໄດ້ມີຄໍາເຫັນເພື່ອຊີ້ນໍາການຈັດຕັ້ງປະຕິບັດວຽກງານໃຫ້ຍຶດໝັ້ນສືບຕໍ່ກໍາແໜ້ນຈຸດປະສົງຄາດໝາຍ ຂອງການກະກຽມດໍາເນີນກອງປະຊຸມໃຫ່ຍຂອງຄະນະພັກແຕ່ລະຂັ້ນ ຕາມ ຄໍາສັ່ງເລກທີ 04 ຂອງຄະນະເລຂາທິການສູນກາງພັກທີ່ໄດ້ກໍານົດໄວ້, ເຊິ່ງເປັນຄວາມຮຽກຮ້ອງຕ້ອງການຂອງພັກເຮົາເພື່ອການດໍາເນີນກອງປະຊຸມໃຫ່ຍໃຫ້ບັນລຸໄດ້ຕາມຈຸດປະສົງລະດັບຄາດໝາຍ. ທັງນີ້ ກໍ່ເພື່ອເປັນການປັບປຸງພາຍໃນພັກໃຫ້ມີຄວາມເຂັ້ມແຂງ ແລະ ຕັ້ງໜ້າກວ່າເກົ່າ.

ການທາບທາມບຸກຄະລາກອນໃນຄັ້ງນີ້ມີຄວາມສໍາຄັນຫຼາຍ, ເຊິ່ງເປັນການຄັດຈ້ອນເລືອກເຟັ້ນເອົາຈາກຜົນການຄັດຈ້ອນຈາກການທາບທາມຮອບທີ I ທີ່ບັນດາສະມາຊິກພັກທົ່ວກະຊວງການເງິນ, ໄດ້ລົງຄໍາຄິດເຫັນ ແລະ ຄົ້ນຄວ້າສະເໜີເປົ້າໝາຍຕ່າງໆທີ່ຈະປະກອບເຂົ້າໃນຄະນະພັກ ໂດຍອີງໃສ່ມາດຖານເງື່ອນໄຂ ແລະ ທັດສະນະຂອງແຕ່ລະສະຫາຍ, ການທາບທາມໃນຄັ້ງນີ້ຈະເປັນພື້ນຖານບ່ອນອີງໃຫ້ແກ່ຄະນະພັກ-ການນໍາຂອງກະຊວງ, ໄດ້ສືບຕໍ່ຄົ້ນຄວ້າບຸກຄະລາກອນ ເພື່ອນໍາເຂົ້າໃນໂຄງປະກອບເຂົ້າສະມັກໃນການເລືອກຕັ້ງຂອງອົງຄະນະພັກກະຊວງການເງິນ ຄັ້ງທີ III ຊິ່ງເປັນການຄັດເລືອກເອົາການນໍາສູງສຸດຂອງກະຊວງ ເພື່ອຈະຜູ້ນໍາ-ນຳພາຂະແໜງການເງິນໄປສູ່ອັນໃໝ່ທີ່ມີລັກສະນະຫັນປ່ຽນຢ່າງຕັ້ງໜ້າ, ເພື່ອໃຫ້ບັນລຸຕາມນະໂຍບາຍຕາມທິດທາງຄາດໝາຍທີ່ກໍານົດໄວ້ໃນມະຕິກອງປະຊຸມໃຫ່ຍ, ໂດຍໃຫ້ຍຶດໝັ້ນໃນມາດຕະຖານເງື່ອນໄຂເປັນສິ່ງສໍາຄັນເປັນບ່ອນອີງ ແລະ ຄົ້ນຄວ້າດ້ວຍຄວາມຮັບ ຜິດຊອບຢ່າງເລິກເຊິ່ງແບບພາວະວິໄສ ເພື່ອຜົນປະໂຫຍດລວມຂອງປະເທດຊາດກໍ່ຄືຂອງຂະແໜງການເງິນ, ເຊິ່ງການທາບທາມໃນຄັ້ງນີ້ແມ່ນມີຜູ້ເຂົ້າຮ່ວມຄັດເລືອກທັງໝົດ 330 ສະຫາຍ, ມີລາຍຊື່ລົງຄັດເລືອກຈໍານວນ 31 ສະຫາຍ ໃນນັ້ນມີຄະນະພັກຊຸດເກົ່າ 8 ສະຫາຍເປົ້າໝາຍໃໝ່ທີ່ຜ່ານການຄົ້ນຄວ້າຈາກຮອບທີ I ຈໍານວນ 23 ສະຫາຍ, ເຊິ່ງການທາບທາມນອກຈາກຈະທາບທາມຄະນະບໍລິຫານງານພັກກະຊວງແລ້ວ, ຍັງເປັນການທາບທາມຄະນະປະຈໍາ, ເລຂາ, ຮອງເລຂາປະທານກວດກາ ແລະ ຮອງປະທານກວດກາ ນໍາອີກດ້ວຍ.

ພ້ອມກັນນັ້ນ, ຍັງໄດ້ມີຄໍາເຫັນເພື່ອເປັນທິດຊີ້ນໍາໃນການປັບປຸງການຮ່າງບົດລາຍງານການເມືອງ ແລະ ບົດສໍາຫຼວດການນໍາພາໃນຫຼາຍໆດ້ານເປັນຕົ້ນ: ໃຫ້ເອົາໃຈໃສ່ການຕີລາຄາວຽກງານກໍ່ສ້າງພັກພະນັກງານ ໂດຍສະເພາະກົນໄກການຊັບຊ້ອນພະນັກງານ ແມ່ນຕ້ອງໄດ້ມີການກວດກາໃຫ້ມີຕາມຄວາມເໝາະສົມ ເພື່ອເປັນການສ້າງພະນັກງານສືບທອດປ່ຽນແທນ, ກວດກາບັນດາບັນຫາທີ່ເຫັນວ່າເປັນການທ່ວງດຶງໃຫ້ແກ່ການພັດທະນາຂະແໜງການເງິນໃຫ້ມີກົນໄກ ແລະ ວິທີການແກ້ໄຂ, ຍົກລະດັບຄວາມຮູ້ວິຊາສະເພາະໃຫ້ມີການຫັນປ່ຽນໃໝ່ ແລະ ອື່ນໆ… ທັງນີ້, ເພື່ອແນໃສ່ໃຫ້ຮັບປະກັນໄດ້ໃນການຈັດຕັ້ງປະຕິບັດວຽກງານໃຫ້ໄດ້ຮັບຜົນສໍາເລັດຕາມລະດັບຄາດໝາຍທີ່ວາງໄວ້.

ໂອກາດດັ່ງກ່າວ, ສະຫາຍ ສົມດີ ດວງດີ ໃຫ້ຮູ້ວ່າ: ການທາບທາມໃນຄັ້ງນີ້ເປັນການທາບທາມຮອບທີ II ເພື່ອຄັດເລືອກເອົາບຸກຄະລາກອນທີ່ມີມາດຕະຖານ, ຄວາມຮັບຜິດຊອບເປັນພະນັກງານຫຼັກແຫຼ່ງຂອງຂະແໜງການເງິນປະກອບເຂົ້າໃນຄະນະບໍລິຫານງານພັກກະຊວງ, ການເຂົ້າຮ່ວມທາບທາມຮອບທີ II ນີ້ແມ່ນຂັ້ນຮອງຫົວໜ້າພະແນກຂຶ້ນໄປ. ສະນັ້ນ, ຕ້ອງໄດ້ເອົາໃຈໃສ່ຄົ້ນຄວ້າຢ່າງຮອບດ້ານຢ່າງພາວະວິໄສ ແລະ ເອົາໃຈໃສ່ຄາດຄະເນຄາດຄະເນໃນທິດທາງໃນ 5 ປີ ຕໍ່ໜ້າໃຫ້ຂະແໜງການເງິນໃຫ້ດີຂຶ້ນການທາບທາມຄັດເລືອກເອົາບຸກຄະລາກອນເຂົ້າໃນການບໍລິຫານງານພັກນີ້ເປັນສິ່ງທີ່ສໍາຄັນຫຼາຍ ເພາະເປັນຜູ້ທີ່ຈະສາມາດຊີ້ນໍາວຽກງານຂະແໜງການເງິນໃຫ້ມີການພັດທະນາຂຶ້ນໄປເລື້ອຍໆ….ພ້ອມກັນນັ້ນ, ໃນກອງປະຊຸມຍັງໄດ້ສະເໜີຜ່ານຮ່າງບົດລາຍງານການເມືອງຂອງຄະນະພັກກະຊວງການເງິນໂດຍຫຍໍ້ເພື່ອໃຫ້ບັນດາສະມາຊິກພັກໄດ້ຮັບຊາບ ແລະ ປັບປຸງດ້ານເນື້ອໃນຂຶ້ນຕື່ມເພື່ອໃຫ້ມີຄວາມຖືກຕ້ອງຄົບຖ້ວນສົມບູນ ເພື່ອນໍາສະເໜີໃນກອງປະຊຸມໃຫ່ຍຂອງອົງຄະນະພັກກະຊວງການເງິນ ອີກດ້ວຍ.

ພາບ/ຂ່າວ:

ອາພັດສະລາ

ວັນທີອອກຂ່າວ:

30/09/2020

ວັນທີເກິດຂ່າວ:

24/09/2020

Close Menu
Top