ສໍາມະນາວິທະຍາສາດລະດັບສູງ ຕໍ່ຮ່າງແຜນພັດທະນາການເງິນແຫ່ງລັດ

ໃນວັນທີ 25 ກັນຍາ 2020 ກະຊວງການເງິນ, ໄດ້ຈັດກອງປະຊຸມສໍາມະນາວິທະຍາສາດລະດັບສູງຕໍ່ຮ່າງແຜນການພັດທະນາຂະແໜງການເງິນແຫ່ງລັດໄລຍະ 5 ປີ (2021-2025) ຂຶ້ນທີ່ໂຮງແຮມຄຣາວພລາຊາ ນະຄອນຫຼວງວຽງຈັນ, ໂດຍການເປັນກຽດເຂົ້າຮ່ວມເປັນປະທານຂອງ ທ່ານ ສົມດີ ດວງດີ ຮອງນາຍົກລັດຖະມົນຕີ ລັດຖະມົນຕີກະຊວງການເງິນ, ມີບັນດາຮອງລັດຖະມົນຕີ, ຮອງຜູ້ວ່າການ, ຮອງປະທານຮອງສະຖາບັນ, ຂະແໜງການກ່ຽວຂ້ອງຈາກບັນດາກະຊວງ, ຄະນະກົມ, ຄະນະພະແນກພະນັກງານ-ລັດຖະກອນເຂົ້າຮ່ວມ.

ໃນກອງປະຊຸມທ່ານ ສົມດີ ດວງດີ ໃຫ້ຮູ້ວ່າ: ກອງປະຊຸມສໍາມະນາວິທະຍາສາດລະດັບສູງໃນຄັ້ງນີ້ແມ່ນເພື່ອປະກອບຄໍາເຫັນຕໍ່ຮ່າງແຜນພັດທະນາຂະແໜງການເງິນແຫ່ງລັດໄລຍະ 5 ປີ (2021-2025) ທີ່ໄດ້ຮ່າງສໍາເລັດເບື່ອງຕົ້ນ ໂດຍໄດ້ສະຫຼຸບຕີລາຄາການພັດທະນາຂະແໜງການເງິນໃນໄລຍະ 5 ປີຜ່ານມາ ແລະ ກໍານົດທິດທາງລວມ ແລະ ຄາດໝາຍສູ້ຊົນໃນຕໍ່ໜ້າ.

ການສ້າງແຜນການພັດທະນາຂະແໜງການເງິນແຫ່ງລັດໄລຍະ 5 ປີ (2021-2025) ເພື່ອເປັນການຈັດຕັ້ງຜັນຂະຫຍາຍ ມະຕິກອງປະຊຸມໃຫຍ່ ຄັ້ງທີ X ແລະ  XI ຂອງພັກ, ມະຕິກອງປະຊຸມໃຫຍ່ຄັ້ງທີ III ຂອງອົງຄະນະພັກກະຊວງການເງິນ, ພ້ອມທັງເປັນການຈັດຕັ້ງປະຕິບັດວິໄສທັດ ຮອບປີ 2030 ແລະ ຍຸດທະສາດການພັດທະນາການເງິນແຫ່ງລັດຮອດປີ 2025 ແລະ ສະຫຼຸບແຜນປະຕິຮູບຂະແໜງການເງິນບາດກ້າວທີ 1 (2018-2020) ແລະ ກໍານົດແຜນພັດທະນາໃສ່ຕໍ່ໜ້າແນ່ໃສ່ພັດທະນາການເງິນແຫ່ງລັດໃຫ້ກ້າວສູ່ໄລຍະໃໝ່ທີ່ມີຄວາມໝັ້ນຄົງ-ກຸ້ມຕົນເອງເທື່ອລະກ້າວ, ເພີ່ມທະວີການຄຸ້ມຄອງຢ່າງເຂັ້ມງວດ, ຫັນເປັນທັນສະໄໝ ແລະ ມີປະສິດທິຜົນສູງ.

 

ກອງປະຊຸມດັ່ງກ່າວໄດ້ສຸມໃສ່ການຄົ້ນຄວ້າ, ປຶກສາຫາລື ແລະ ປະກອບຄໍາຄິດຄໍາເຫັນໃສ່ 3 ຫົວຂໍ້ໃຫຍ່ທີ່ສໍາຄັນ, ເຊິ່ງເປັນເນື້ອໃນທີ່ພົວພັນກ່ຽວກັບແຜນພັດທະນາຂະແໜງການເງິນໃນ 5 ປີຕໍ່ໜ້າເປັນຕົ້ນ: ສະພາບ ແລະ ການແກ້ໄຂບັນຫາຄວາມຫຍຸ້ງຍາກທາງດ້ານການເງິນ-ງົບປະມານ, ສະພາບ ແລະ ການແກ້ໄຂບັນຫາທາງດ້ານໜີ້ສິນສາທາລະນະ ແລະ ແຜນພັດທະນາການຄຸ້ມຄອງການເງິນແຫ່ງລັດ (ລາຍຮັບ-ລາຍຈ່າຍ) ແບບດິຈິຕອນ, ເຊິ່ງທັງ 3 ຫົວຂໍ້ດັ່ງກ່າວນີ້ມີຄວາມສໍາຄັນຫຼາຍສໍາລັບຂະແໜງການເງິນ ເພື່ອຈະໄດ້ພ້ອມກັນປຶກສາຫາລືວາງທິດທາງແກ້ໄຂໃນຕໍ່ໜ້າໃຫ້ຊັດເຈນ ແລະ ສາມາດຈັດຕັ້ງປະຕິບັດໄດ້.

ທັງນີ້, ເພື່ອໃຫ້ເນື້ອໃນຮ່າງແຜນພັດທະນາຂະແໜງການເງິນໄລຍະ 5 ປີ (2021-2025) ມີເນື້ອໃນທີ່ຄົບຖ້ວນສົມບູນສອດຄ່ອງກັບສະພາບການຕົວຈິງ, ຈຶ່ງສະເໜີໃຫ້ບັນດາຂະແໜງການ ແລະ ທຸກພາກສ່ວນທີ່ເຂົ້າຮ່ວມກອງປະຊຸມຍົກສູງຄວາມຮັບຜິດຊອບ ແລະ ເປັນເຈົ້າການສຸມສະຕິປັນຍາເພື່ອປະກອບຄໍາຄິດເຫັນຢ່າງສ້າງສັນ ແລະ ກົງໄປກົງມາໂດຍສະເພາະແມ່ນທິດທາງ ແລະ ແຜນການໃນຕໍ່ໜ້າໃນການພັດທະນາຂະແໜງການເງິນ ເພື່ອນໍາໄປປັບປຸງເນື້ອໃນໃຫ້ຄົບຖ້ວນຂຶ້ນຕື່ມ. 

ພາບ/ຂ່າວ:
ວັນທີອອກຂ່າວ:

30/09/2020

ວັນທີເກິດຂ່າວ:

20/09/2020

Close Menu
Top