ຄະນະສະເພາະກິດ COVID-19 ປຶກສາຫາລືມາດຕະການຜ່ອນຜັນໃນຕໍ່ໜ້າ

ໃນວັນທີ 23 ກັນຍາຜ່ານມາ, ທີ່ຫ້ອງປະຊຸມກົມສ່ວຍສາອາກອນ ກະຊວງການເງິນ, ຄະນະສະເພາະກິດໂຄວິດ-19 (COVID-19) ໄດ້ຈັດກອງປະຊຸມປຶກສາຫາລືກ່ຽວກັບການພິຈາລະນາການຜ່ອນຜັນມາດຕະກາານການປ້ອງກັນ, ຄວບຄຸມ ແລະ ແກ້ໄຂການລະບາດຂອງພະຍາດໂຄວິດ-19 ແລະ ສະເໜີທິດທາງໃນຕໍ່ໜ້າຫຼັງວັນທີ 30 ກັນຍາ, ໂດຍການເປັນປະທານຂອງທ່ານ ສົມດີ ດວງດີ ຮອງນາຍົກລັດຖະມົນຕີ ລັດຖະມົນຕີກະຊວງການເງິນ, ຫົວໜ້າຄະນະະສະເພາະກິດ ເພື່ອປ້ອງກັນ, ຄວບຄຸມ ແລະ ແກ້ໄຂການລະບາດພະຍາດໂຄວິດ-19, ພ້ອມດ້ວຍຄະນະສະເພາະກິດ ແລະ ຂະແໜງການກ່ຽວກັບຂ້ອງເຂົ້າຮ່ວມ.

ໃນກອງປະຊຸມທ່ານ ຮສ. ດຣ ພູທອນ ເມືອງປາກ ຮອງລັດຖະມົນຕີກະຊວງສາທາລະນະສຸກ ທັງເປັນ ຫົວໜ້າກອງເລຂາຄະນະສະເພາະກິດໂຄວິດ-19 ໄດ້ຂຶ້ນຜ່ານບົດລາຍງານໃນການຈັດຕັ້ງປະຕິບັດບັນດາມາດຕະການປ້ອງກັນ, ຄວບຄຸມ, ສະກັດກັ້ນ ແລະ ແກ້ໄຂການລະບາດຂອງພະຍາດ ໂຄວິດ-19 ໃນສປປ ລາວ ແຕ່ວັນທີ 01-23 ກັນຍາຜ່ານມາໄດ້ຍົກໃຫ້ເຫັນສະພາບການຢູ່ໃນສປປ ລາວ ເລີ່ມແຕ່ເດືອນມັງກອນ 2020 ເຖິງປັດຈຸບັນໄດ້ມີການເກັບຕົວຢ່າງເພື່ອກວດວິເຄາະຫາເຊື້ອພະຍາດ COVID-19 ທັງໝົດ 48.774 ຕົວຢ່າງ, ສະເພາະວັນທີ 01-22 ກັນຍາ 2020 ໄດ້ເກັບຕົວຢ່າງ 9.029 ຄົນ, ຈຳນວນຜູ້ຕິດເຊື້ອສະສົມມີ 23 ກໍລະນີ,  ບໍ່ມີຜູ້ເສຍຊີວິດ,  ປີ່ນປົວຫາຍດີ 22 ກໍລະນີ, ປັດຈຸບັນກໍາລັງຕິດຕາມປິ່ນປົວຢູ່ໂຮງໝໍມິດຕະພາບ 01 ຄົນ, ບໍ່ມີຜູ້ຕິດເຊື້ອພາຍໃນປະເທດນັບແຕ່ວັນທີ່ 12 ເມສາ 2020 (ກໍລະນີທີ 19 ເປັນກໍລະນີທີ່ຕິດເຊື້ອພາຍໃນປະເທດຫຼ້າສຸດ) ຜູ້ຕິດເຊື້ອນຳເຂົ້າຈາກຕ່າງປະເທດຜູ້ສຸດທ້າຍວັນທີ 10 ກັນຍາ 2020, ສຳລັບວັນທີ 23 ກັນຍາ 2020 ແມ່ນບໍ່ພົບຜູ້ຕິດເຊື້ອໃໝ່.

         ສຳລັບທິດທາງແຜນການໃນຕໍ່ໜ້າພາຍຫຼັງວັນທີ30 ກັນຍາ 2020, ຄະນະສະເພາະກິດເພື່ອປ້ອງກັນ, ຄວບຄຸມ ແລະ ແກ້ໄຂການລະບາດພະຍາດໂຄວິດ-19 ໄດ້ສະເໜີຂໍທິດຊີ້ນຳປະຕິບັດມາດຕະການຜ່ອນຜັນໃນເດືອນຕຸລາ 2020 ເນື່ອງຈາກ ປະຈຸບັນພາຍໃນປະເທດ ບໍ່ມີຜູ້ຕິດເຊື້ອໃນຊຸມຊົນ 4 ເດືອນກວ່າ ແລ້ວ, ທຸກພາກສ່ວນໄດ້ກັບມາໃຊ້ຊີວິດ ແລະ ເຄື່ອນໄຫວວຽກງານ, ເຄື່ອນໄຫວທຸລະກິດພາຍໄຕ້ເງື່ອນໄຂໃໝ່ປົກກະຕິແລ້ວ, ສະເໜີຂໍທິດຊີ້ນຳປະຕິບັດມາດຕະການຜ່ອນຜັນ ແລະ ສືບຕໍ່ເຂັ້ມງວດບາງມາດຕະການໃນເດືອນຕຸລາ 2020 ດັ່ງນີ້: ສະເໜີໃຫ້ເປີດບໍລິການຮ້ານບັນເທິງ ແລະ ຮ້ານຄາລາໂອເກະ ເພື່ອຫຼຸດຜ່ອນຜົນກະທົບທາງດ້ານການດຳເນີນທຸລະກິດ ໂດຍໃຫ້ກຳນົດ ແລະ ຈັດຕັ້ງປະຕິບັດເວລາປິດຢ່າງເຂັ້ມງວດ, ພ້ອມທັງເອົາໃຈໃສ່ໃນການຮັກສາຄວາມສະອາດ ແລະ ອະນາໄມສະຖານທີ່ປະກອບການສຳລັບຮ້ານເກມແມ່ນສືບຕໍ່ໂຈະຊົ່ວຄາວ.

ພາບ/ຂ່າວ:

          (ຈັນທະລາ)

ວັນທີອອກຂ່າວ:

30/09/2020

ວັນທີເກິດຂ່າວ:

23/09/2020

Close Menu
Top