ຮອງນາຍົກ ຕ້ອນຮັບທູດ EU ເຂົ້າຢ້ຽມອຳລາສຳເລັດການປະຕິບັດໜ້າທີ່

ໃນວັນທີ 19 ກໍລະກົດ 2020 ທີ່ກະຊວງການເງິນ, ທ່ານ ສົມດີ ດວງດີ ຮອງນາຍົກລັດຖະມົນຕີ ລັດຖະມົນຕີກະຊວງການເງິນ,ໄດ້ຕ້ອນຮັບການເຂົ້າຢ້ຽມອຳລາຂອງທ່ານ ລີໂອ ຟາເບີ (Mr Leo Faber) ເອກອັກຄະລັດຖະທູດສະຫະພາບເອີຣົບ ຫຼື EU ປະຈໍາ ສປປ ລາວ, ພ້ອມດ້ວຍຄະນະໃນໂອກາດສໍາເລັດໜ້າທີ່ການທູດຢູ່ ສປປ ລາວ.

ໂອກາດດັ່ງກ່າວ, ທ່ານ ສົມດີ ດວງດີ ໄດ້ສະແດງຄວາມຍິນດີຕ້ອນຮັບ, ຊົມເຊີຍ ແລະ ຕີລາຄາສູງຕໍ່ການພົວພັນຮ່ວມມືສອງຝ່າຍລະຫວ່າງລາວEU ຕະຫຼອດໄລຍະຜ່ານມາຈົນເຖິງປັດຈຸບັນປີ 2020. ພ້ອມກັນນັ້ນ, ກໍ່ສະແດຄວາມຂອບໃຈຕໍ່ການເອົາໃຈໃສ່ປະກອບສ່ວນຢ່າງຫ້າວຫັນຂອງທ່ານທູດ, ຊ່ວຍຊຸກຍູ້ສົ່ງເສີມສາຍພົວພັນມິດ  ຕພາບ ແລະ ການຮ່ວມມືລາວEU ຂະຫຍາຍຕົວ ແລະ ແຕກດອກອອກຜົນຍິ່ງຂຶ້ນ.

 

ຕະຫຼອດໄລຍະເວລາທີ່່ທ່ານ ລີໂອ ຟາເບີ (Mr Leo Faber) ດໍາລົງຕໍາແໜ່ງເປັນເອກອັກຄະລັດຖະທູດ ສະຫະພາບເອີຣົບ ປະຈໍາ ສປປ ລາວ ໄດ້ປະກອບສ່ວນຕໍ່ສປປ ລາວ ຫຼາຍຢ່າງເປັນຕົ້ນ: ໄດ້ຊີ້ນຳວຽກງານການປຶກສາຫາລືກ່ຽວກັບແຜນການຮ່ວມມື (Joint Programming) ຂອງ EU ກັບບັນດາປະເທດສະມາຊິກ EU ສຳລັບສປປ ລາວ ໄລຍະປີ 2016 – 2020 ທີ່ມີມູນຄ່າ 524.2 ລ້ານເອີໂຣ (ໃນນັ້ນ: ການຊ່ວຍເຫຼືອຈາກ EU ມີມູນຄ່າ 162 ລ້ານເອີໂຣ ແລະ ການຊ່ວຍເຫຼືອຈາກບັນດາປະເທດສະມາຊິກມູນຄ່າ 362.2 ລ້ານເອີໂຣ). 

ແຜນການຮ່ວມດັ່ງກ່າວໄດ້ສ້າງຂຶ້ນໂດຍອີງໃສ່ເງື່ອນໄຂ ແລະ ທ່າແຮງຂອງບັນດາປະເທດສະມາຊິກເພື່ອສະໜັບສະໜູນ 8 ຂະແໜງການບຸລິມະສິດຂອງລັດຖະບານຄື: ຂົງເຂດກະສິກຳ ແລະ ພັດທະນາຊົນນະບົດ, ຂົງເຂດສຶກສາທິການ, ຂົງເຂດຊັບພະຍາກອນທຳມະຊາດ ແລະ ສິ່ງແວດລ້ອມ, ຂົງເຂດການປົກຄອງ, ຂົງເຂດສາທາລະນະສຸກ, ຂົງເຂດໂພຊະນາການ, ຂົງເຂດການພັດທະນາພາກເອກະຊົນ ແລະ ຂົງເຂດອື່ນໆ.

ພ້ອມທັງ, ໄດ້ຊີ້ນຳການຊ່ວຍເຫຼືອ ເພື່ອປັບປຸງການຄຸ້ມຄອງການເງິນພາກລັດ (Public Financial Management), ຊຶ່ງ EU ໄດ້ສະໜອງທຶນຊ່ວຍເຫຼືອລ້າມູນຄ່າ 2 ລ້ານເອີໂຣໃນປີ 2016 ໃຫ້ກະຊວງການເງິນ ໂດຍຜ່ານທະນາຄານໂລກ ເພື່ອປັບປຸງວຽກງານການຄຸ້ມຄອງການເງິນພາກລັດ, ເພື່ອຊ່ວຍກະຊວງການເງິນຈັດຕັ້ງປະຕິບັດແຜນຍຸດທະສາດການພັດທະນາຂະແໜງການເງິນໄລຍະກາງ ແລະ ຂັ້ນຕອນການຮັບຮອງແຜນງົບປະມານ ປະຈຳປີຕາມກົດໝາຍງົບປະມານສະບັບປັບປຸງໃໝ່, ການສ້າງຄວາມອາດສາມາດການຈັດຕັ້ງປະຕິບັດ, ການສະຫຼຸບລາຍງານ ແລະ ແຜນງົບປະມານແຫ່ງລັດ ແລະ ອື່ນໆທີ່ຕິດພັນກັບການປັບປຸງລະບົບການຄຸ້ມຄອງການເງິນພາກລັດ.

          ທ່ານ ຮອງນາຍົກລັດຖະມົນຕີ ຍັງໄດ້ຕີລາຄາສູງການປະຕິບັດວຽກງານການພົວພັນຮ່ວມມືໃນໄລຍະຜ່ານມາ,ເປັນການປະກອບສ່ວນອັນສໍາຄັນໃນການພັດທະນາເສດຖະກິດ-ສັງຄົມກໍ່ຄືການປະຕິບັດແຜນ 5 ປີ ຄັ້ງທີ VIII, ໃຫ້ການຊ່ວຍເຫຼືອໃນການແກ້ໄຂຄວາມທຸກຍາກຂອງປະຊາຊົນໂດຍສະເພາະການຍົກລະດັບວຽກງານໃນຂົງເຂດໂພສະນາການ, ການສຶກສາ, ຂົງເຂດສັງຄົມ ແລະ ອື່ນໆ.

ຂ່າວ: ອາພັດສະລາ ຈັນທະວົງ

 

 

ພາບ/ຂ່າວ:
ວັນທີອອກຂ່າວ:
ວັນທີເກິດຂ່າວ:
Close Menu
Top