16 ໜ່ວຍພັກຂຶ້ນກັບຄະນະພັກຮາກຖານພະແນກການເງິນ ນວ ໄດ້ຮັບໃບຢັ້ງຢືນໜ່ວຍພັກປອດໃສ, ເຂັ້ມແຂງ, ໜັກແໜ້ນ

ໂດຍອີງຕາມມະຕິຕົກລົງເລກທີ 397/ຄພ.ນວ, ລົງວັນທີ 17 ມິຖຸນາ 2020 ຂອງຄະນະປະຈຳພັກນະຄອນຫຼວງວຽງຈັນວ່າດ້ວຍການຮັບຮອງໜ່ວຍພັກປອດໃສ, ເຂັ້ມແຂງ, ໜັກແໜ້ນ ປະຈຳປີ 2019 ຄະນະປະຈຳພັກນະຄອນຫຼວງວຽງຈັນຕົກລົງເຫັນດີຮັບຮອງໜ່ວຍພັກປອດໃສ, ເຂັ້ມແຂງ, ໜັກແໜ້ນ ປະຈຳປີ 2019 ຈຳນວນ 664 ໜ່ວຍພັກ; ໜ່ວຍພັກຮາກຖານ ແລະ ໜ່ວຍພັກທີ່ຂຶ້ນກັບຄະນະພັກຮາກຖານພະແນກການ, ອົງການທຽບເທົ່າ, ຫ້ອງການອ້ອມຂ້າງນະຄອນຫຼວງວຽງຈັນ 59 ໜ່ວຍພັກ. ໃນນັ້ນ, ຄະນະພັກຮາກຖານພະແນກການເງິນນະຄອນຫຼວງວຽງຈັນລວມມີ 16 ໜ່ວຍພັກທີ່ໄດ້ຮັບໃບຢັ້ງຢືນ ແລະ ຖືກຮັບຮອງເປັນໜ່ວຍພັກປອດໃສ, ເຂັ້ມແຂງ, ໜັກແໜ້ນ.

ພິທີດັ່ງກ່າວຈັດຂຶ້ນໃນວັນທີ 14 ກໍລະກົດ 2020 ໂດຍໃຫ້ກຽດເຂົ້າຮ່ວມ ແລະ ມອບໃບຢັ້ງຢືນຂອງ ສະຫາຍ ປອ ອາດສະພັງທອງ ສີພັນດອນ ກຳມະການປະຈຳພັກ ຮອງເຈົ້າຄອງນະຄອນຫຼວງວຽງຈັນ, ຊຶ່ງມີສະຫາຍ ສິລິລາດທົງສິນ ທອງເພັງ ເລຂາຄະນະພັກຮາກຖານ ຫົວໜ້າພະແນກການເງິນນະຄອນຫຼວງວຽງຈັນ, ມີຄະນະຈັດຕັ້ງນະຄອນຫຼວງວຽງຈັນ, ບັນດາສະຫາຍເລຂາຄະນະພັກຮາກຖານ, ບັນດາສະຫາຍເລຂາໜ່ວຍພັກ, ຮອງເລຂາໜ່ວຍພັກ, ບັນດາກຳມະການພັກ, ຄະນະພັກຮາກຖານ ແລະ ສະມາຊິກພັກພາຍໃນໜ່ວຍພັກເຂົ້າຮ່ວມ.

ໃນໂອກາດດັ່ງກ່າວ, ສະຫາຍ ສິລິລາດທົງສິນ ທອງເພັງ ເລຂາຄະນະພັກຮາກຖານ ຫົວໜ້າພະແນກການເງິນນະຄອນຫຼວງວຽງຈັນໄດ້ສະຫຼຸບຕີລາຄາຜົນການຕິດຕາມປະເມີນໜ່ວຍພັກແຂງຮູ້ນຳພາຮອບດ້ານກວມເອົາ 4 ຂະແໜງການມີຈຳນວນ 16 ໜ່ວຍພັກທີ່ຂຶ້ນກັບຄື: ພະແນກການເງິນມີ 5 ໜ່ວຍພັກ, ສ່ວຍສາອາກອນປະຈໍານະຄອນຫຼວງວຽງຈັນມີ 4 ໜ່ວຍພັກ, ຄັງເງິນແຫ່ງຊາດປະຈຳນະຄອນຫຼວງວຽງຈັນມີ 1 ໜ່ວຍພັກ ແລະ ກອງຄຸ້ມຄອງພາສີ Vມີ 6 ໜ່ວຍພັກ ທີ່ໄດ້ຕັ້ງໜ້າຈັດຕັ້ງປະຕິບັດ ຜັນຂະຫຍາຍແຜນການ, ເຮັດໜ້າທີ່ຂອງຕົນຢ່າງຫ້າວຫັນ, ຕັ້ງໜ້າສຸມທຸກເຫື່ອແຮງເຂົ້າໃນການຈັດຕັ້ງປະຕິບັດແຜນການສ້າງໜ່ວຍພັກເຂັ້ມແຂງຮູ້ນຳພາຮອບດ້ານຂອງຕົນຢ່າງເປັນເຈົ້າການ.

ຄະນະພັກຮາກຖານພະແນກການເງິນ ນວ ມີທັງໝົດ 9 ສະຫາຍ, ຍິງ 2 ສະຫາຍ. ໃນນັ້ນ, ຄະນະປະຈຳພັກ, ເລຂາຄະນະພັກຮາກຖານ, ຮອງເລຂາຄະນະພັກຮາກຖານ, ປະທານກວດກາພັກ, ຄະນະກວດກາພັກ, ມີຈຳນວນສະມາຊິກພັກທັງໝົດ 335 ສະຫາຍ, ຍິງ 113 ສະຫາຍ, ສະມາຊິກພັກສົມບູນ 316 ສະຫາຍ, ຍິງ 105 ສະຫາຍ ແລະ ສະມາຊິກພັກສຳຮອງ 19 ສະຫາຍ, ຍິງ 8 ສະຫາຍ.

ໂອກາດດຽວກັນນີ້,ໃຫ້ກຽດຂຶ້ນມອບໃບຢັ້ງຢືນໂດຍສະຫາຍ ປອ ອາດສະພັງທອງ ສີພັນດອນ ກຳມະ ການປະຈຳພັກ ຮອງເຈົ້າຄອງນະຄອນຫຼວງວຽງຈັນ ພ້ອມທັງໄດ້ສະແດງຄວາມຊົມເຊີຍຕໍ່ຄະນະພັກຮາກຖານພະແນກການເງິນນະຄອນຫຼວງວຽງຈັນ ທີສາມາດຍາດໄດ້ຜົນສຳເລັດເປັນກ້າວໆຊີ້ນຳນຳພາວຽກງານວິຊາສະເພາະຂອງຕົນດ້ວຍຄວາມຫ້າວຫັນ ແລະ ມີຄວາມຮັບຜິດຊອບສູງ. ສືບຕໍ່ສຶກສາຄຸນທາດການເມືອງ, ກໍາແໜ້ນແນວທາງຂອງພັກ,ບຸກບືນຫ້າວຫັນຮັກສານາມມະຍົດໜ່ວຍພັກເຂັ້ມແຂງຮູ້ນຳພາຮອບດ້ານໃຫ້ຄົງຢູ່ຕະຫຼອດໄປ.

                                                                                                                                             ຂ່າວ: ຫັດທະພອນ

ພາບ/ຂ່າວ:
ວັນທີອອກຂ່າວ:
ວັນທີເກິດຂ່າວ:
Close Menu
Top