ສຳເລັດຊຸດຝຶກອົບຮົມວຽກງານ ໂຄສະນາຂ່າວສານການເງິນຫັນເປັນທັນສະໄໝ

ໃນວັນທີ 26 ມິຖຸນາ 2020 ຜ່ານມາ, ທີ່ພະແນກການເງິນແຂວງຫຼວງນໍ້າທາ, ໄດ້ຈັດພິທິປິດຊຸດຝຶກອົບຮົມວຽກງານໂຄສະນາ ແລະ ຂ່າວສານການເງິນ ຫັນເປັນສູ່ທັນສະໄໝ ຄັ້ງທີ IV ໃນຫົວຂໍ້: ການຄຸ້ມຄອງ, ວິເຄາະ ແລະ ນໍາໃຊ້ສື່ສັງຄົມອອນລາຍ”.

ໂດຍການເຂົ້າຮ່ວມຂອງທ່ານ ສົມບູນ ອິນທະປັດຖາ ຫົວໜ້າຫ້ອງກະຊວງການເງິນ, ທ່ານ ຄຳວິສັນ ແກ້ວສຸວັນ ຜູ້ຊ່ວຍຫົວໜ້າຄະນະໂຄສະນາອົບຮົມສູນກາງພັກ, ທ່ານ ກອນແສງ ຄັນທະວົງ ຄະນະພະແນກການເງິນແຂວງຫຼວງນໍ້າທາ, ວິທະຍາກອນ, ນັກສໍາມະນາກອນຈາກພະແນກການເງິນ 11 ແຂວງ ແລະ ສື່ມວນຊົນຈາກພະແນກຖະແຫຼງຂ່າວ, ວັດທະນະທໍາ ແລະ ທ່ອງທ່ຽວ 11 ແຂວງເຂົ້າຮ່ວມ.

ຊຸດຝຶກອົບຮົມໃນຄັ້ງນີ້, ຈັດຂຶ້ນໃນລະຫວ່າງວັນທີ 24-26 ມິຖຸນາ 2020; ຊຶ່ງພະແນກໂຄສະນາ ແລະ ຂ່າວສານການເງິນຮ່ວມກັບຄະນະໂຄສະນາອົບຮົມສູນກາງພັກ, ໂດຍໄດ້ຮັບຄວາມຮ່ວມມື້ຈາກພະແນກການເງິນແຂວງຫຼວງນໍ້າທາ, ຈຸດປະສົງເພື່ອຕອບສະໜອງກັບຄວາມຮຽກຮ້ອງຕ້ອງການຂອງວຽກງານໂຄສະນາຂ່າວສານຂະ ແໜງ ການເງິນໃນໄລຍະໃໝ່ ແລະ ຫັນເປັນສະໄໝ, ທັນກັບສະພາບການໃນການພັດທະນາຂອງວຽກງານຂະແໜງ ການເງິນໃນປັດຈຸບັນໂດຍສະເພາະແມ່ນການບໍາລຸງສ້າງບຸກຄະລາກອກອນຂ່າວ (ສື່ມວນຊົນ) ຂອງຂະແໜງການເງິນໃຫ້ມີຄຸນນະພາບດີຂຶ້ນເລື້ອຍໆ.

ຄຽງຄູ່ກັນນີ້, ເປັນການສ້າງຕາໜ່າງຂ່າວຂອງຂະແໜງການເງິນໃຫ້ກວ້າງຂວາງໃນຂອບເຂດທົ່ວປະເທດ, ເປັນການສ້າງຄວາມເຂັ້ມແຂງໃຫ້ແກ່ວຽກງານໂຄສະນາແນວທາງນະໂຍບາຍຂອງພັກລັດ ໂດຍສະເພາະແມ່ນແນວ ທາງນະໂຍບາຍ, ລະບຽບກົດໝາຍດ້ານການເງິນໃຫ້ສັງຄົມໄດ້ຮັບຮູ້ເຂົ້າໃຈ, ແນໃສ່ຍົກລະດັບດ້ານຄຸ້ມຄອງ, ວິເຄາະ ແລະ ນໍາໃຊ້ສື່ສັງຄົມອອນລາຍໃນປັດຈຸບັນ, ການຂຽນບົດ, ຂ່າວ, ວິທີການສົ່ງບົດຂ່າວໃຫ້ຜູ້ປະສານງານຜູ້ຮັບຜິດ ຊອບວຽກງານໂຄສະນາຢູ່ບັນດາກົມກອງທ້ອງຖິ່ນຫັນສູ່ທັນສະໄໝ.

ຊຸດອົບຮົມໃນຄັ້ງນີ້,ບັນດານັກສຳມະນາກອນໄດ້ຮຽນຮູ້ພາກທິດສະດີ, ພາກປະຕິດບັດຕົວຈິ່ງໄປພ້ອມໆກັນເປັນຕົ້ນ: ຮຽນຮູ້ຫຼັກການພື້ນຖານໃນການຂຽນຂ່າວ, ການເກັບກໍາຂໍ້ມູນ, ບັນທຶກເຫດການ, ຊອກຫາແຫຼ່ງຂໍ້ມູນ-ຂ່າວສານ ຫຼື ລາຍງານຂ່າວທີ່ທັນກັບສະພາບການ, ສາມາດວິເຄາະຂໍ້ມູນຂ່າວສານ, ຂ່າວແທ້, ຂ່າວປອມໃນຍຸກສື່ແບບໃໝ່,ການສົ່ງຂ່າວຈາກແຂວງໃຫ້ກະຊວງກໍ່ຄືລາຍງານຂ່າວໃຫ້ພະແນກໂຄສະນາ-ຂ່າວສານການເງິນໄດ້ຢ່າງເປັນປົກກະຕິໃຫ້ແກ່ສື່ສານມວນຊົນຂອງຂະແໜງການເງິນໃຫ້ມີຫຼາຍສີສັນ.

ໂອກາດດັ່ງກ່າວ, ທ່ານ ສົມບູນ ອິນທະປັດຖາ ໄດ້ມີຄຳເຫັນບາງຕອນອັນສຳຄັນໃຫ້ສໍາມະນາກອນ, ຈົ່ງນຳເອົາບົດຮຽນໄປຜັນຂະຫຍາຍເຂົ້າໃນວຽກງານຕົວຈິງ. ໃນການເຄື່ອນໄຫວໜ້າທີ່ການເມືອງຂອງວຽກງານຂະແໜງ ການເງິນ, ນໍາເອົາແນວທາງນະໂຍບາຍຂອງພັກ, ລະບຽບກົດໝາຍຂອງລັດ ແລະ ບັນດາຜົນງານຂອງຂະແໜງການເງິນເຜີຍແຜ່ອອກສູ່ສັງຄົມນັບມື້ກ້ວາງຂວາງ ແລະ ເຂົ້າສູ່ລະບຽບການ. ໃນຕອນທ້າຍພິທີຍັງໄດ້ມອບຂອງລາງວັນໃຫ້ບັນດາບັນກອນທີ່ຂຽນບົດຂ່າວໄດ້ດີເດັ່ນ ແລະ ມອບໃບຢັ້ງຢືນສຳເລັດຊຸດຝຶອົບຮົມໃນຄັ້ງນີ້.

ພາບ/ຂ່າວ:
ວັນທີອອກຂ່າວ:
ວັນທີເກິດຂ່າວ:
Close Menu
Top