ປະຕິບັດກົນໄກ ປະກັນໄພ ເພື່ອຫຼຸດຜ່ອນຄວາມສ່ຽງໄພພິບັດທຳມະຊາດ

ໃນວັນທີ 16 ມິຖຸນາ 2020 ທີ່ໂຮງແຮມຄຣາວພາຊາ ນະຄອນຫຼວງວຽງຈັນ, ກົມຄຸ້ມຄອງລັດວິສາຫະກິດ ລັດລົງທຶນ ແລະ ການປະກັນໄພ ກະຊວງການເງິນ, ໄດ້ຈັດກອງປະຊຸມເຜີຍແຜ່ວຽກງານການຈັດຕັ້້ງປະຕິບັດກົນໄກປະກັນໄພ, ເພື່ອຫຼຸດຜ່ອນຄວາມສ່ຽງໄພພິບັດທຳມະຊາດໃນພາກພື້ນອາຊີຕາເວັນອອກສ່ຽງໃຕ້ (SEADRIF), ພ້ອມທັງເຜີຍແຜ່ກົດໝາຍວ່າດ້ວຍການປະກັນໄພ (ສະບັບປັບປຸງ) ນຳອີກດ້ວຍ.

IMG_4485

ໂດຍການເປັນປະທານຂອງທ່ານ ປອ ສອນເພັດ ອິນທະວົງ ຮັກສາການຫົວໜ້າກົມຄຸ້ມຄອງລັດວິສາຫະກິດ ລັດລົງທຶນ ແລະ ການປະກັນໄພ ກະຊວງການເງິນ, ຄະນະກົມ, ຄະນະພະແນກ, ຜູ້ຕາງໜ້າແຕ່ລະບໍລິສັດປະກັນໄພ ພ້ອມດ້ວຍພະນັກງານວິຊາການເຂົ້້າຮ່ວມ.

 

ທ່ານ ປອ ສອນເພັດ ອິນທະວົງ ໄດ້ມີຄຳເຫັນກ່ຽວການຈັດຕັ້ງປະຕິບັດການປະກັນໄພ ເພື່ອຫຼຸດຜ່ອນຄວາມສ່ຽງໄພພິບັດທຳມະຊາດໃນພາກພື້ນອາຊີຕາເວັນອອກສ່ຽງໃຕ້, ຊຶ່ງກະຊວງການເງິນ ຕາງໜ້າໃຫ້ສປປ ລາວ ພວມຈັດຕັ້ງປະຕິບັດ, ຊຶ່ງວຽກງານດັ່ງກ່າວລັດຖະບານກໍ່ຄືກະຊວງການເງິນເຫັນວ່າຈະເປັນເຄື່ອງມືດ້ານການເງິນທີ່ສຳຄັນໃນການຄຸ້ມຄອງ ແລະຫຼຸດຜ່ອນຜົນກະທົບຈາກໄພພິບັດທີ່ພວກເຮົາກຳລັງປະເຊີນໜ້າ, ຊຶ່ງເຫັນວ່ານັບມື້ນັບຮຸນແຮງ ແລະ ເກີດຂຶ້ນຢ່າງຕໍ່ເນື່ອງພ້ອມທັງຈະປະກອບສ່ວນຊ່ວຍຮັກສາຄວາມໝັ້ນຄົງທາງດ້ານການເງິນຂອງລັດຖະບານ ແລະ ຫຼຸດຜ່ອນຜົນກະທົບຂອງໄພພິິບັດຕໍ່ເສດຖະກິດ-ສັງຄົມໃນຕໍ່ໜ້າ.

ໃນກອງປະຊຸມຍັງໄດ້ເຜີຍແຜ່ກົດໝາຍວ່າດ້ວຍ ການປະກັນໄພ (ສະບັບປັບປຸງ), ຊຶ່ງກົດໝາຍວ່າດ້ວຍ ການປະກັນໄພ ສະບັບປັບປຸງນີ້ໄດ້ຖືກນຳສະເໜີ ແລະຮັບຮອງຈາກກກອງປະຊຸມສະໄໝສາມັນເທື່ອທີ 8 ຂອງສະພາແຫ່ງຊາດຊຸດທີ 8 ໃນວັນທີ 29 ພະຈິກ 2019 ດ້ວຍຄະແນນສຽງ 95,45% ຂອງຈຳນວນສະມາຊິກສະພາແຫ່ງຊາດທີ່ເຂົ້າຮ່ວມ (ສະບັບເລກທີ 78/ສພຊ, ລົງວັນທີ 29 ພະຈິກ 2019) ຖືກປະກາດໃຊ້ຕາມລັດຖະດຳລັດຂອງປະທານປະເທດ ສະບັບ ເລກທີ 030/ ປປທ, ລົງວັນທີ 10 ມັງກອນ 2020 ແລະ ໄດ້ລົງໃນຈົດໝາຍເຫດທາງລັດຖະການໃນວັນທີ 30 ມີນາ 2020 ຊຶ່ງເຮັດໃຫ້ກົດໝາຍສະບັບປັບປຸງນີ້ມີຜົນສັກສິດນັບແຕ່ວັນທີ 13 ເມສາ 2020 ເປັນຕົ້ນມາ.

           ກົດໝາຍວ່າດ້ວຍ ການປະກັນໄພ (ສະບັບປັບປຸງ) ປະກອບມີ 11 ພາກ, 12 ໝວດ, 100 ມາດຕາ, ຊຶ່ງປັບປຸງຈາກ 14 ພາກ, 13 ໝວດ ແລະ 126 ມາດຕາຕາມກົດໝາຍສະບັບປີ 2011, ໃນນີ້, ໄດ້ປັບປຸງໜ້ອຍ ຫຼື ບໍ່ໄດ້ປັບປຸງ 14 ມາດຕາ, ກຳນົດເຂົ້າໃໝ່ 32 ມາດຕາ, ຕັດອອກ 58 ມາດຕາ.

ກົດໝາຍວ່າດ້ວຍ ການປະກັນໄພ ສະບັບດັ່ງກ່າວຈະຊ່ວຍໃຫ້ການຄຸ້ມຄອງ ແລະດຳເນີນທຸລະກິດປະກັນໄພຢູ່ສປປ ລາວ ມີປະສິດທິຜົນ, ພ້ອມທັງຮັບປະກັນການປົກປ້ອງສິດຜົນປະໂຫຍດຂອງທຸກພາກສ່ວນກ່ຽວຂ້ອງທີ່ມີສ່ວນຮ່ວມໃນວຽກງານປະກັນໄພ ນຳອີກດ້ວຍ.

 

ພາບ-ຂ່າວ: ປ່ຽນນິສາ

ພາບ/ຂ່າວ:
ວັນທີອອກຂ່າວ:
ວັນທີເກິດຂ່າວ:
Close Menu
Top