ບໍລິສັດ ໄທຄົມ ແລະ ບໍລິສັດ ເອັສທີ ເທເລມີເດຍ ມອບເງິນສົມທົບໃຫ້ຄະນະສະເພາະກິດໂຄວິດ-19

ໃນວັນທີ 20 ພຶດສະພາ 2020 ທີ່ກະຊວງການເງິນ, ບໍລິສັດ ໄທຄົມ ຈໍາກັດ ມະຫາຊົນ (Thaicom Public Company Limited) ແລະ ບໍລິສັດ ເອັສທີ ເທເລມີເດຍ (ST Telemedia) ຊຶ່ງທັງສອງບໍລິສັດຜູ້ຖືຮຸ້ນໃນ Shenington Investments PTE LTD. ໄດ້ມອບເງິນສົມທົບໃຫ້ຄະນະສະເພາະກິດເພື່ອປ້ອງກັນ, ຄວບຄຸມ ແລະ ແກ້ໄຂ ການແຜ່ລະບາດຂອງເຊື້ອພະຍາດໂຄວິດ19 ຢູ່ ສປປ ລາວ ເປັນຈໍານວນເງິນ 10.000 ໂດລາສະຫະລັດ.

ໂດຍການມອບຂອງທ່ານ ປີຍະວັດ ຈະຣິຍະເສດຖະພົງ ຮອງຜູ້ອໍານວຍການໃຫຍ່ບໍລິສັດ ລາວ ໂທລະຄົມມະນາຄົມ ມະຫາຊົນ ທັງເປັນກໍາມະການຜູ້ຈັດການໃນ Shenington Investments PTE LTD ເປັນຕົວແທນໃຫ້ກັບທັງສອງບໍລິສັດດັ່ງກ່າວ ແລະ ໃຫ້ກຽດກ່າວຮັບໂດຍທ່ານ ບຸນໂຈມ ອຸບົນປະເສີດ ຮອງລັດຖະມົນຕີກະຊວງການເງິນ, ທັງເປັນຫົວໜ້າໜ່ວຍງານງົບປະມານ ແລະ ພາລາທິການ ຄະນະສະເພາະກິດໂຄວິດ-19, ມີຄະນະນໍາ ແລະ ພາກສ່ວນກ່ຽວຂ້ອງທັງສອງພາກສ່ວນເຂົ້າຮ່ວມ.

ສຳລັບເງິນຈໍານວນດັ່ງກ່າວລັດຖະບານ ສປປ ລາວ ກໍ່ຄືຄະນະສະເພາະກິດຈະນໍາໃຊ້ເຂົ້າໃນການຈັດຊື້ອຸ ປະກອນທາງການແພດເປັນຕົ້ນແມ່ນ: ເຄື່ອງຊ່ວຍຫາຍໃຈ, ອຸປະກອນທີ່ມີຄວາມຈໍາເປັນລວມທັງພາຫະນໍາທີ່ນໍາສົ່ງຄົນເຈັບ ແລະ ອື່ນໆໃຫ້ເກີດປະໂຫຍດອັນສູງສຸດເພື່ອປ້ອງກັນ, ຄວບຄຸມ ແລະ ແກ້ໄຂ ການແຜ່ລະບາດຂອງເຊື້ອພະຍາດ ໂຄວິດ19 ໃນ ສປປ ລາວ ແລະ ເຮັດໃຫ້ສະພາບເສດຖະກິດສັງຄົມລາວ ກັບຄືນສູ່ສະພາບປົກກະຕິໂດຍໄວ.

 

ຂ່າວ: ອາພັດສະລາ

ພາບ/ຂ່າວ:
ວັນທີອອກຂ່າວ:
ວັນທີເກິດຂ່າວ:
Close Menu
Top