ເຜີຍແຜ່ແຜນຍຸດທະສາດ ແລະ ວິໄສທັດຂະແໜງການເງິນ ໃຫ້ສະມາຊິກຊາວໜຸ່ມທົ່ວກະຊວງການເງິນ

                 ໃນວັນທີ 20 ພຶດສະພາ 2020 ທີ່ກົມສ່ວຍສາອາກອນ ກະຊວງການເງິນ, ໄດ້ຈັດກອງປະຊຸມເຜີຍແຜ່ແຜນຍຸດທະສາດການເງິນປີ 2021-2025 ແລະ ວິໄສທັດຮອດປີ 2030 ແລະ ຮ່າງຍຸດທະສາດຂະແໜງສ່ວຍສາອາກອນປີ 2021-2025 ໃຫ້ຄະນະບໍລິຫານງານຊາວໜຸ່ມກະຊວງ, ຄະນະໜ່ວຍຊາວໜຸ່ມບັນດາກົມ ແລະ ສະມາຊິກຊາວໜຸ່ມທົ່ວກະຊວງການເງິນ.

IMG_1267

ໂດຍການເປັນປະທານຂອງທ່ານ ພູທະນູເພັດ ໄຊສົມບັດ ຫົວໜ້າກົມສ່ວຍສາອາກອນ, ມີທ່ານ ນາງ ສີຟົງ ອຸມາວົງ ຮອງຫົວໜ້າກົມນະໂຍບາຍການເງິນ ແລະ ນິຕິກຳ, ມີຕາງໜ້າເລຂາໜ່ວຍຊາວໜຸ່ມບັນດາກົມອ້ອມຂ້າງກະຊວງເຂົ້າຮ່ວມ.

 

ກອງປະຊຸມເຜີຍແຜ່ແຜນຍຸດທະສາດການເງິນໃຫ້ສະມາຊິກຊາວໜຸ່ມທົ່ວກະຊວງການເງິນ, ເພື່ອເປັນການສ້າງຂະບວນການຂໍ່ານັບຮັບຕ້ອນກອງປະຊຸມຄະນະພັກຮາກຖານ ກົມສ່ວຍສາອາກອນທີ່ຈະຈັດຂຶ້ນໃນມໍ່ໆນີ້,  ທັງເປັນການເຮັດໃຫ້ສະມາຊິກຊາວໜຸ່ມທົ່ວກະຊວງການເງິນເຂົ້າໃຈກ່ຽວວິໄສທັດແຜນຍຸດທະສາດການເງິນປີ 2021-2025 ແລະ ວິໄສທັດຮອດປີ 2030 ແລະ ຮ່າງຍຸດທະສາດຂະແໜງສ່ວຍສາອາກອນປີ 2021-2025 ເພື່ອນຳໄປຈັດຕັ້ງປະຕິບັດຢ່າງມີປະສິດທິຜົນ.

ນອກນັ້ນ, ຍັງເປັນການສ້າງຂະບວນການວຽກງານວິຊາສະເພາະຂອງຊາວໜຸ່ມກະຊວງການເງິນ, ເນື່ອງຈາກວ່າກໍາລັງຊາວໜຸ່ມໄດ້ເປັນກໍາລັງປະຈັນບານ, ເປັນແຫຼ່ງສະໜອງກໍາລັງໜຸ່ມໃຫ້ແກ່ພັກ, ເປັນຜູ້ສືບທອດພາລະກິດປະຕິວັດຂອງພັກ, ຂອງຊາດໃນອານາຄົດອັນສະຫວ່າງສະໄຫວນັ້ນຄື: ປະຊາຊົນຮັ່ງມີຜ່າສຸກ, ປະເທດຊາດມັ່ງຄັ່ງເຂັ້ມແຂງ, ສັງຄົມສາມັກຄີປອງດອງ, ມີປະຊາທິປະໄຕ, ມີຄວາມຍຸຕິທໍາ ແລະ ສີວິໄລ.

 

ປັດຈຸບັນກະຊວງການເງິນ, ໄດ້ເອົາໃຈໃສ່ຕໍ່ຄະນະບໍລິຫານງານຊາວໜຸ່ມກະຊວງ ແລະ ໄດ້ສ້າງເງື່ອນໄຂອໍານວຍຄວາມສະດວກທຸກຢ່າງເຮັດໃຫ້ຊາວໜຸ່ມ, ໄວໜຸ່ມທົ່ວຂະແໜງການເງິນໃຫ້ມີຄວາມເຕີບໃຫຍ່ເຂັ້ມແຂງກ້າວຂຶ້ນຢ່າງບໍ່ຢຸດຢັ້ງ, ອັນເປັນການປະກອບສ່ວນສໍາຄັນເຂົ້າໃນການຈັດຕັ້ງປະຕິບັດໜ້າທີ່ຍຸດທະສາດຂອງຂະແໜງການເງິນນັບທັງວຽກງານພາຍໃນ, ຮ່ວມມືສາກົນ ແລະ ອື່ນໆ.

ໃນກອງປະຊຸມດັ່ງກ່າວ, ທ່ານ ນາງ ສີຟົງ ອຸມາວົງ ຮອງຫົວໜ້າກົມນະໂຍບາຍການເງິນ ແລະ ນິຕິກຳ, ໄດ້ເຜີິຍແຜ່ແຜນຍຸດທະສາດການພັດທະນາການເງິນແຫ່ງລັດໃນໄລຍະ 15 ປີຜ່ານມາ (ແຕ່ປີ 2000 ຫາ 2015 ), ວິໄສທັດຮອດປີ 2030 ແລະ ຍຸດທະສາດພັດທະນາການເງິນແຫ່ງລັດຮອດປີ 2025 ແລະ ມາດຕະການຈັດຕັ້ງປະຕິບັດ,  ຕິດຕາມ, ປະເມີນຜົນ ແລະ ລາຍງານຜົນຈັດຕັ້ງປະຕິບັດ.

ນອກນັ້ນ, ຍັງໄດ້ຮັບຟັງການເຜີຍແຜ່ຮ່າງຍຸດທະສາດຂະແໜງສ່ວຍສາອາກອນປີ 2021 – 2025 ຈາກທ່ານ ວິເດດ ກິນນາວົງ ຫົວໜ້າພະແນກແຜນການ  ແລະ  ຮ່ວມມືອາກອນສາກົນ ກົມສ່ວຍສາອາກອນ ກະຊວງການເງິນ ນໍາອີກດ້ວຍ.

 

ພາບ-ຂ່າວ: ປ່ຽນນິສາ

ພາບ/ຂ່າວ:
ວັນທີອອກຂ່າວ:
ວັນທີເກິດຂ່າວ:
Close Menu
Top