ໜ່ວຍພັກຮາກຖານວິທະຍາໄລການເງິນພາກໃຕ້ ເປີດກອງປະຊຸມໃຫຍ່ ຄັ້ງທີ III ເລືອກຄະນະໜ່ວຍຊຸດໃໝ່

              ໃນວັນທີ 5 ມີນາ 2020 ຜ່ານມາທີ່ສະໂມສອນວິທະຍາໄລການເງິນພາກໃຕ້ ແຂວງຈຳປາສັກ, ໜ່ວຍພັກຮາກຖານວິທະຍາໄລການເງິນພາກໃຕ້ຂຶ້ນກັບອົງຄະນະພັກແຂວງຈຳປາສັກ, ໄດ້ເປີດກອງປະຊຸມໃຫຍ່ ຄັ້ງທີ III ຂຶ້ນໂດຍການໃຫ້ກຽດເຂົ້າຮ່ວມເປັນປະທານຂອງສະຫາຍ ນິພອນ ວຽງປະເສີດ ຮອງເລຂາຄະນະບໍລິຫານງານພັກແຂວງ ຫົວໜ້າຄະນະຈັດຕັ້ງແຂວງຈຳປາສັກ, ມີສະຫາຍ ສົມບູນ ເຮືອງວົງສາ ກຳມະການພັກແຂວງ ເລຂາຄະນະພັກຮາກຖານ ຫົວໜ້າພະແນກງານເງິນແຂວງຈຳປາສັກ, ມີຮອງຫົວໜ້າຄະນະຈັດຕັ້ງແຂວງ, ເລຂາໜ່ວຍພັກ, ຮອງເລຂາພັກໜ່ວຍພັກ, ສະມາຊິກພັກສົມບູນ-ສຳຮອງພາຍໃນໜ່ວຍພັກວິທະຍາໄລການເງິນພາກໃຕ້ເຂົ້າຮ່ວມ.

            ໃນກອງປະຊຸມສະຫາຍ ນາງ ບຸນເພັງ ພົມມາພັກດີ ເລຂາໜ່ວຍພັກໜ່ວຍພັກຮາກຖານວິທະຍາໄລການເງິນພາກໃຕ້, ໄດ້ຂຶ້ນຜ່ານບົດລາຍງານການເມືອງຂອງໜ່ວຍພັກຮາກຖານວິທະຍາໄລການເງິນພາກໃຕ້. ຈາກນັ້ນ, ໃນພິທີໄດ້ປ່ອນບັດຄັດເລືອກເອົາຄະນະໜ່ວຍພັກຮາກຖານຊຸດໃໝ່ 3 ສະຫາຍ, ຈາກຜູ້ລົງສະໝັັກເລືອກຕັ້ງທັງໝົດ 5 ສະຫາຍ,ຍິງ 2 ສະຫາຍ, ໂດຍເລືອກໄດ້: ສະຫາຍ ນາງ ບຸນເພັງ ພົມມາພັກດີ ເປັນເລຂາໜ່ວຍພັກ,
ສະຫາຍ ບຸນເຮັງ ພົມມະເທບ ເປັນຮອງເລຂາໜ່ວຍພັກ, ສະຫາຍ ຄຳຜ່ອນ ວິລະວົງ ເປັນປະທານກວດກາໜ່ວຍພັກຮາກຖານວິທະຍາໄລການເງິນພາກໃຕ້.

               ໃນຕອນທ້າຍຂອງກອງປະຊຸມຂອງສະຫາຍ ນິພອນ ວຽງປະເສີດ ຮອງເລຂາຄະນະບໍລິຫານງານພັກແຂວງ  ຫົວໜ້າຄະນະຈັດຕັ້ງແຂວງຈຳປາສັກ ໄດ້ມີຄຳເຫັນໂອ້ລົມຊີ້ທິດເຍືອງທາງໃຫ້ແກ່ສະຫາຍສະມາຊິກພັກໃນໜ່ວຍພັກ ໂດຍສະເພາະຄະນະໜ່ວຍພັກຊຸດໃໝ່, ຕ້ອງໄດ້ຖືເອົາດ້ານການເມືອງແນວຄິດອຸ່ນອ່ຽງທຸ່ນທ່ຽງໃນການຊີ້ນຳ-ນຳພາປະກອບໃນວຽກງານວິຊາສະເພາະໃຫ້ຮັບປະສິດທິຜົນດີສົມກັບຄະນະພັກຂັ້ນເທິງ ແລະ ບັນດາສະມາຊິກທັງໝົດໃຫ້ມີຄວາມເດັດ ດ່ຽວໜຽວແໜ້ນ, ມີຄວາມເຊື່ອໝັ້ນຕໍ່ອຸດົມການຂອງພັກ, ມີຄວາມສາມັກຄີເປັນປຶກແຜນ, ຕັ້ງໜ້າປະຕິບັດໜ້າທີ່ການເມືອງແນວຄິດ ແລະ ວຽກງານວິຊາສະເພາະໃຫ້ໄດ້ຮັບຜົນສຳເລັດ ແລະ ມີຄຸນນະພາບສູງ.

ຂໍ້ມູນ-ພາບ: ວິທະຍາໄລການເງິນພາກໃຕ້

ພາບ/ຂ່າວ:
ວັນທີອອກຂ່າວ:
ວັນທີເກິດຂ່າວ:
Close Menu
Top