ໜ່ວຍສະຫະພັນກຳມະບານ ກົມພາສີ ເປີດກອງປະຊຸມ ໃຫຍ່ຄັ້ງທີ III

ກອງປະຊຸມໃຫຍ່ ຄັ້ງທີ III ໜ່ວຍສະຫະພັນກຳມະບານກົມພາສີ ກະຊວງການເງິນ, ໄດ້ໄຂຂຶ້ນໃນທາມກາງບັນຍາກາດບົນພື້ນຖານພະນັກງານລັດຖະກອນຂະແໜງພາສີໃນຂອບເຂດທົ່ວປະເທດ ກຳລັງຈັດຕັ້ງປະຕິບັດແຜນພັດທະນາເສດ ຖະກິດສັງຄົມ ແລະ ແຜນງົບປະມານແຫ່ງລັດປີ 2020 ເວົ້າລວມເວົ້າສະເພາະການຈັດຕັ້ງປະຕິບັດວຽກງານວິຊາສະເພາະຂອງກົມພາສີໃນ 6 ເດືອນຕົ້ນປີ 2020 ໃຫ້ບັນລຸຕາມລະດັບຄາດໝາຍທີ່ວາງໄວ້.

 

ຊຶ່ງກອງປະຊຸມໄດ້ຈັດຂຶ້ນໃນວັນທີ 19 ກຸມພາ 2020 ໂດຍການເຂົ້າຮ່ວມເປັນປະທານຂອງທ່ານ ສົມບູນ ອິນທະປັດຖາ ປະທານສະຫະພັນກຳມະບານກະຊວງການເງິນ, ມີທ່ານ ບຸນປະເສີດ ສີກຸນລະບຸດ ຮັກສາການຫົວໜ້າກົມພາສີ, ທ່ານ ຄຳປຸ່ນ ອິນແປງລາດຊະບຸດ ຫົວໜ້າໜ່ວຍກຳມະບານກົມພາສີ ພ້ອມດ້ວຍສະມາຊິກກຳມະບານພາຍໃນກົມ ແລະ ແຂກຖືກເຊີນເຂົ້າຮ່ວມ.

ກອງປະຊຸມ, ທ່ານ ຄຳປຸ່ນ ອິນແປງລາດຊະບຸດ ໄດ້ຜ່ານບົດລາຍງານການເມືອງ ແລະ ບົດສຳຫຼວດໜ່ວຍກຳມະບານ ໃນໄລຍະ 5 ປີຜ່ານມາຊຶ່ງໄດ້ຖືສຳຄັນ ແລະ ເອົາໃຈໃສ່ຕໍ່ການສຶກສາອົບຮົມການເມືອງ-ແນວຄິດໃຫ້ຖັນແຖວສະມາຊິກກຳມະບານຢ່າງເປັນປົກກະຕິ ແລະ ຕໍ່ເນື່ອງເປັນຕົ້ນແມ່ນເຂົ້າຮ່ວມຄົ້ນຄ້ວາຮໍ່າຮຽນມະຕິກອງປະຊຸມໃຫຍ່ຄັ້ງທີ IX ຂອງພັກ, ມະຕິກອງປະຊຸມໃຫຍ່ຄັ້ງທີ VI ຂອງສະຫະພັນກຳມະບານລາວ, ມະຕິກອງປະຊຸມໃຫຍ່ຄັ້ງທີ II ຂອງອົງຄະນະພັກກະຊວງການເງິນ, ຂໍ້ກຳນົດກົດໝາຍຕ່າງໆກ່ຽວກັບແຮງງານ, ເຂົ້າຮ່ວມຮັບຟັງການປາ ຖະກະຖາມູນເຊື້ອວັນສຳຄັນຕ່າງໆຂອງຊາດ, ຂອງພັກ, ຂອງອົງການຈັດຕັ້ງສະຫະພັນກຳມະບານ, ມູນເຊື້ອຂອງກຳລັງປ້ອງກັນຊາດ-ປ້ອງກັນຄວາມສະຫງົບ, ມູນເຊື້ອວັນສ້າງຕັ້ງແນວລາວສ້າງຊາດ, ຮໍ່າຮຽນເອົາແບບແຜນການນຳພາເຮັດວຽກ, ຄຸນສົມບັດສິນທຳປະຕິວັດຂອງບັນດາທ່ານຜູ້ນຳເພື່ອນຳໄປພັດທະນາຕົນເອງໃຫ້ສາມາດຕອບສະໜອງ ໜ້າທີ່ການເມືອງທີ່ພັກ-ລັດມອບໝາຍໃຫ້ດ້ວຍຄວາມຮັບຜິດຊອບສູງ ແລະ ສາມາດເຮັດສຳເລັດໜ້າທີ່ຂອງຕົນໄດ້ເປັນຢ່າງດີ.

ພ້ອມນັ້ນ, ຍັງໄດ້ສ້າງຂະບວນການຂໍ່ານັບຮັບຕ້ອນກອງປະຊຸມໃຫຍ່,ວັນບຸນສຳຄັນຕ່າງໆຂອງຊາດໂດຍຕິດພັນກັບຂໍ້ແຂ່ງຂັນຮັກຊາດ ແລະ ພັດທະນາ, ວຽກງານສ້າງຂະບວນການແຂ່ງຂັນ 2 ດີ 5 ເປັນເຈົ້າໂດຍໄດ້ຍົກສູງບົດບາດໃນການນຳພາສະມາຊິກກຳມະບານພ້ອມກັນສຸມທຸກກຳລັງເຫື່ອແຮງ ແລະ ສູ້ຊົນຍາດໄດ້ຜົນສຳເລັດທີ່ພົ້ນເດັ່ນໃນຫຼາຍດ້ານ.

ກອງປະຊຸມຄັ້ງນີ້ໄດ້ປ່ອນບັດເລືອກຕັ້ງເອົາຄະນະໜ່ວຍກຳມະບານຊຸດໃໝ່ຊຶ່ງໄດ້ເປັນເອກະສັນເລືອກຕັ້ງເອົາທ່ານ ສຸກສະຫວັນ ບົວພາ ເປັນຫົວໜ້າໜ່ວຍສະຫະພັນກຳມະບານກົມພາສີ, ທ່ານ ກໍລະກັນ ສະຣິດທິລາດ ເປັນຮອງຫົວໜ້າໜ່ວຍ ທັງເປັນປະທານກວດກາ, ທ່ານ ພຸດທະນິກອນ ເຄນນະວົງ ເປັນຮອງຫົວໜ້າໜ່ວຍ, ທ່ານ ສິລິວັນ ພັນຄຳຜິວ ແລະ ທ່ານ ສຸດໃຈ ອິນທະວົງ ເປັນຄະນະໜ່ວຍສະພັນກຳມະບານກົມພາສີຊຸດໃໝ່.

ກອງປະຊຸມໄດ້ຮັບຟັງການໂອ້ລົມຈາກທ່ານ ສົມບູນ ອິນທະປັດຖາ ຊຶ່ງໄດ້ສະແດງຄວາມຊົມເຊີຍຕໍ່ການຊີ້ນຳນຳພາຂອງຄະນະໜ່ວຍສະຫະພັນກຳມະບານຊຸດເກົ່າທີ່ປະຕິບັດໜ້າທີ່ການເມືອງຂອງຕົນ, ສາມາກຍາດໄດ້ຜົນງານ ແລະ ມີຜົນສຳເລັດຫຼາຍດ້ານ. ພ້ອມນັ້ນ, ຍັງຮຽກຮ້ອງມາຍັງຄະນະໜ່ວຍສະຫະພັນກຳມະບານກົມພາສີຊຸດໃໝ່ສືບຕໍ່ປັບປຸງແກ້ໄຂບັນດາດ້ານອ່ອນຄົງຄ້າງ ແລະ ເຊີດຊູສະຕິປັນຍາ ແລະ ຄວາມຮັບຜິດຊອບສູງຕໍ່ໜ້າທີ່ການເມືອງຂອງຕົນໃຫ້ສູງຂຶ້ນເຮັດໃຫ້ວຽກງານວິຊາສະເພາະກໍ່ຄືວຽກງານໜ່ວຍກຳມະບານຂອງຂະແໜງພາສີມີການຫັນປ່ຽນ ໃໝ່ທີ່ຕັ້ງໜ້າ ແລະ ມີຜົນສຳເລັດຍິ່ງໃຫຍ່ໃຫຍ່ຫຼວງກ່ວາເກົ່າ.

ພາບ/ຂ່າວ:
ວັນທີອອກຂ່າວ:
ວັນທີເກິດຂ່າວ:
Close Menu
Top