ບໍລິສັດ ທີ່ປຶກສາ ດ້ານການລົງທຶນ ມອບເຄື່ອງກວດເຊື້ອໂຄໂຣນາໃຫ້ລັດຖະບານ

            ໃນວັນທີ 10 ກຸມພາ 2020, ທາງບໍລິສັດ ທີ່ປຶກສາ ດ້ານການລົງທຶນ ແລະ ກໍ່ສ້າງເຂື່ອນໄຟຟ້າ ຈຳກັດຜູ້ດຽວ, ໄດ້ນຳເຄື່ອງກວດຫາເຊື້ອພະຍາດອັກເສບປອດເຊື້ອຈຸລາໂລກສາຍພັນໃໝ່ ຫຼື ໂຄໂຣນາ ໄວຣັດ, ພ້ອມດ້ວຍອຸປະກອນຮັບໃຊ້ຈຳນວນໜຶ່ງລວມມູນຄ່າທັງໝົດ 205.000 ໂດລາສະຫະລັດ.

            ໂດຍການກ່າວມອບຂອງທ່ານ ປີຊາໄຊ ແກ້ວໄຊຍະຈັກ ປະທານບໍລິສັດ ທີ່ປຶກສາ ດ້ານການລົງທຶນ ແລະ ກໍ່ສ້າງເຂື່ອນໄຟຟ້າ ຈຳກັດຜູ້ດຽວ, ຕາງໜ້າຮັບຂອງທ່ານ ສົມດີ ດວງດີ ຮອງນາຍົກລັດຖະມົນຕີ ລັດຖະມົນຕີກະຊວງການເງິນ, ທັງເປັນປະທານຄະນະກຳມະການສະເພາະກິດປ້ອງກັນ ແລະ ຄວບຄຸມພະຍາດອັກເສບປອດທີ່ເກີດຈາກເຊື້ອຈຸລະໂລກສາຍພັນໃໝ່ ຫຼື ໂຄໂຣນາ ໄວຣັສ, ໂດຍການເຂົ້າຮ່ວມຂອງທ່ານ ບຸນກອງ ສີຫາວົງ ລັດຖະມົນຕີກະຊວງ ສາທາລະນະສຸກ, ມີຫົວໜ້າຫ້ອງການກະຊວງການເງິນ, ຄະນະກົມ, ພ້ອມດ້ວຍພາກສ່ວນທີ່ກ່ຽວຂ້ອງເຂົ້າຮ່ວມ.

            ສຳລັບເຄື່ອງທີ່ນຳມາມອບໃນຄັ້ງນີ້, ເປັນການຊ່ວຍເຫຼືອລ້າຈາກບໍລິສັດ ທີ່ປຶກສາ ດ້ານການລົງທຶນ ແລະ ກໍ່ສ້າງເຂື່ອນໄຟຟ້າ ຈຳກັດ ຜູ້ດຽວ, ຊຶ່ງປະກອບມີເຄື່ອງກວດເຊື້ອພະຍາດຈຳນວນ 2 ເຄື່ອງ; ນ້ຳຢາກວດຫາເຊື້ອພະຍາດ 2.500 ຫຼອດ, ຖົງມືຈຳນວນ 40.000 ຄູ່; ເຄື່ອງນຸ່ງປ້ອງກັນເຊື້ອໂລກຈຳນວນ 1.200 ຊຸດລວມມູນຄ່າທັງໝົດ 205.000 ໂດລາສະຫະລັດ.

          ໂອກາດນີ້, ທ່ານ ສົມດີ ດວງດີ, ໄດ້ກ່າວຊົມເຊີຍ ແລະ ສະແດງຄວາມຮູ້ບຸນຄຸນຢ່າງສູງຕໍ່ການຊ່ວຍເຫຼືອດັ່ງກ່າວ, ຊຶ່ງເຫັນວ່າມີຄວາມສຳຄັນຈຳເປັນທີ່ສຸດຕໍ່ລັດຖະບານ ສປປ ລາວໃນປັດຈຸບັນເພື່ອຕອບໂຕ້ການແຜ່ລະບາດຂອງເຊື້ອໄວຣັສໂຄໂຣນາ ແລະ ຈະນຳໃຊ້ ເຄື່ອງຊ່ວຍເຫຼືອດັ່ງກ່າວເຂົ້າໃນວຽກງານຢ່າງມີປະສິດທິຜົນ. ຂະນະດຽວກັນທ່ານ ບຸນກອງ ສີຫາວົງ ລັດຖະມົນຕີກະຊວງ ສາທາລະນະສຸກ ໄດ້ສະແດງຄວາມຂອບໃຈມາຍັງບໍລິສັດ ທີ່ປຶກສາ ດ້ານການລົງທຶນ ແລະ ກໍ່ສ້າງເຂື່ອນໄຟຟ້າ ຈຳກັດຜູ້ດຽວ ໃນການຊ່ວຍເຫຼືອເຄື່ອງ ແລະ ອຸປະກອນຄັັ້ງນີ້, ຊຶ່ງຈະສາມາດຊ່ວຍໃນດ້ານການແພດມີປະສິດທິພາບຂຶ້ນຕື່ມ.

          ພ້ອມນັ້ນ, ຍັງໄດ້ແຈ້ງໃຫ້ຮູ້ຜ່ານສື່ມວນຊົນວ່າມາເຖິງປັດຈຸບັນຢູ່ສປປ ລາວ ແມ່ນຍັງບໍ່ທັນມີກໍລະນີໄດ້ທີ່ຢັ້ງຢືນວ່າແມ່ນເຊື້ອພະຍາດໂຄໂຣນາໄວຣັດເທື່ອ. ທັງນີ້, ກໍ່ເພື່ອເຮັດໃຫ້ສັງຄົມກໍຄືປະຊາຊົນລາວບໍ່ໃຫ້ກັງວົນ ແລະ ເຊື່ອໃນສື່ສັງຄົມອອນລາຍຕ່າງໆທີ່ເຜີຍແຜ່ອອກໄປນັ້ນ ແຕ່ຢ່າງໃດກໍ່ດີທາງລັດຖະບານລາວໂດຍສະເພາະແມ່ນກະຊວງສາທາລະນະສຸກໄດ້ເຝົ້າລະວັງຢ່າງເຂັ້ມງວດພາຍໃຕ້ການຊີ້ນຳຂອງລັດຖະບານຢ່າງໃກ້ຊິດ, ຊຶ່ງໄດ້ເອົາໃຈໃສ່ກວດກາເຂັ້ມງວດຢູ່ບາງດາດ່ານສາກົນ, ສະໜາມບິນທີ່ມີຊາຍແດນຕິດຈອດກັບ ສປ ຈີນ.    

ພາບ/ຂ່າວ:
ວັນທີອອກຂ່າວ:
ວັນທີເກິດຂ່າວ:
Close Menu
Top