ໜ່ວຍພັກພະແນກແຜນການ ແລະ ຂໍ້ມູນຂ່າວສານ ສະຫຼຸບວຽກງານໃນໄລຍະຜ່ານມາ

            ໃນວັນທີ 7 ກຸມພາ 2020 ໜ່ວຍພັກພະແນກແຜນການ ແລະ ຂໍ້ມູນຂ່າວສານ ທີ່ຂຶ້ນກັບຄະນະພັກຮາກຖານກົມພາສີ, ໄດ້ເປີດກອງປະຊຸມໃຫ່ຍ ສະມາຊິກພັກ ຄັ້ງທີ I ຂຶ້ນທີ່ຫ້ອງປະຊຸມກົມພາສີໂດຍການເຂົ້າຮ່ວມຂອງສະຫາຍ ສົມເພັດ ສີວົງໄຊ ຮອງເລຂາຄະນະພັກຮາກຖານກົມພາສີ, ສະຫາຍ ສູນທະລາ ຕະກຸນທອງ ເລຂາໜ່ວຍພັກພະແນກແຜນການ ແລະ ຂໍ້ມູນຂ່າວສານ, ສະຫາຍ ອະນຸສັກ ສີສະອາດ ຮອງເລຂາໜ່ວຍພັກພະແນກແຜນການ ແລະ ຂໍ້ມູນຂ່າວສານ, ມີຕາງໜ້າ ສາມອົງການຈັດຕັ້ງມະຫາຊົນ, ພ້ອມດ້ວຍສະມາຊິກພັກພາຍໃນໜ່ວຍ ແລະ ແຂກທີຖືກເຊີນເຂົ້າຮ່ວມ.

             ໂອກາດດັ່ງກ່າວ,ສະຫາຍ ສູນທະລາ ຕະກຸນທອງ ຍັງໄດ້ຜ່ານບົດລາຍງານການເມືອງ, ທິດທາງຄາດໝາຍສູ້ຊົນວຽກງານແຕ່ລະດ້ານກ່ຽວກັບວຽກງານກໍ່ສ້າງພັກ-ພະນັກງານ ແລະ ບົດສໍາຫຼວດການນໍາພາລວມຂອງຄະນະພັກຊຸດເກົ່າ. ໃນນັ້ນ, ໄດ້ຕີລາຄາດ້ານດີ, ດ້ານອ່ອນ, ຂໍ້ຄົງຄ້າງ, ສາເຫດ, ບົດຮຽນໃນການຊີ້ນໍາ-ນໍາພາ ແລະ ການຈັດຕັ້ງປະຕິບັດມະຕິກອງປະຊຸມໃຫ່ຍໃນໄລຍະ 5 ປີຜ່ານມາ, ພ້ອມທັງກໍານົດທິດທາງແຜນການຈັດຕັ້ງປະຕິບັດວຽກງານໃນຕໍ່ໜ້າ.

              ໃນກອງປະຊຸມຍັງໄດ້ມີການປະກອບຄໍາຄິດເຫັນໃສ່ບົດລາຍງານການເມືອງ ແລະ ບົດສໍາຫຼວດການນໍາພາ ລວມຂອງຄະນະພັກເພື່ອເຮັດໃຫ້ສອງບົດດັ່ງກ່າວມີເນື້ອໃນຄົບຖ້ວນສົມບູນ ແລະ ນໍາໄປຈັດຕັ້ງປະຕິບັດໃນຕໍ່ໜ້າໄດ້ຖືກຕ້ອງສົມບູນ, ພ້ອມນັ້ນ ຜູ້ແທນກອງປະຊຸມຍັງໄດ້ໃຊ້ສິດປະຊາທິປະໄຕຂອງຕົນປ່ອນບັດເລືອກຕັ້ງເອົາຄະນະພັກຊຸດໃໝ່ບົນພື້ນຖານຫຼັກການລວມສູນປະຊາທິປະໄຕຖືກຕ້ອງສອດຄ່ອງກັບມາດຖານເງື່ອນໄຂທີ່ກໍານົດໄວ້, ຊຶ່ງມີສະໝັກເລືອກຕັ້ງ 5 ສະຫາຍ ແລະ ເລືອກໄດ້ 2 ສະຫາຍຄື: ສະຫາຍ ສູນທະລາ ຕະກຸນທອງ ເປັນເລຂາໜ່ວຍພັກພະແນກແຜນການ ແລະ ຂໍ້ມູນຂ່າວສານ, ສະຫາຍ ອະນຸສັກ ສີສະອາດ ເປັນຮອງເລຂາໜ່ວຍພັກພະແນກແຜນການ ແລະ ຂໍ້ມູນຂ່າວສານ ເພື່ອສືບຕໍ່ຊີ້ນໍາ-ນໍາພາວຽກງານຂອງໜ່ວຍພັກພະແນກແຜນການ ແລະ ຂໍ້ມູນຂ່າວສານໃນຕໍ່ໜ້າ ໃຫ້ໄດ້ຮັບຜົນສໍາເລັດອັນຈົບງາມ.

IMGL4083

ໂອກາດດັ່ງກ່າວ, ສະຫາຍ ສົມເພັດ ສີວົງໄຊ ໄດ້ໃຫ້ກຽດໂອ້ລົມຕໍ່ກອງປະຊຸມ ແລະ ໄດ້ຍ້ອງຍໍຊົມເຊີຍຕໍ່ການນໍາພາ, ຊີ້ນໍາຂອງຄະນະພັກຊຸດເກົ່າ ທີ່ໄດ້ນໍາພາ, ຊີ້ນໍາພະນັກງານ, ສະມາຊິກພັກພາຍໃນໜ່ວຍພັກປະຕິບັດໜ້າທີ່ການເມືອງຂອງຕົນ, ຍາດໄດ້ຜົນງານ ແລະ ຜົນສໍາເລັດຫຼາຍດ້ານ, ພ້ອມກັນນັ້ນ, ສະຫາຍຍັງໄດ້ມີຄວາມເປັນຫ່ວງເປັນໃຍ ຕໍ່ດ້ານອ່ອນ ຂໍ້ຄົງຄ້າງ ແລະ ໄດ້ຮຽກຮ້ອງໃຫ້ຄະນະໜ່ວຍພັກຊຸດໃໝ່ຕ້ອງສືບຕໍ່ນໍາພາ ປັບປຸງ, ແກ້ໄຂ ແລະ ໃຫ້ທິດຊີ້ນໍາວຽກງານແຕ່ລະດ້ານ ໃນທາງທີ່ສ້າງສັນ ເພື່ອໃຫ້ຍາດໄດ້ຜົນງານ ແລະ ຜົນສໍາເລັດອັນໃຫ່ຍຫຼວງກວ່າເກົ່າ ໂດຍສະເພາະວຽກງານການເມືອງແນວຄິດ ແລະ ຄວາມເປັນແບບຢ່າງຂອງສະມາຊິກພັກ, ວຽກງານວິຊາສະເພາະ ແລະ ການຫັນເປັນທັນສະໄໝ ເປັນຕົ້ນການວິເຄາະ, ວິໃຈ, ສະຫຼຸບສັງລວມສະຖິຕິ ແລະ ລາຍຮັບການສົ່ງອອກ-ນໍາເຂົ້າໃຫ້ທັນຕາມກໍານົດໝາຍ, ຮັບປະກັນການນໍາໃຊ້ລະບົບເຄື່ອຂ່າຍ ແລະ ຊອບແວຕ່າງໆໃຫ້ສາມາດນໍາໃຊ້ໄດ້ເປັນປົກກະຕິ, ສືບຕໍ່ພັດທະນາລະບົບໃຫ້ມີຄວາມເປັນທັນສະໄໝຂຶ້ນເທື່ອລະກ້າວ,ສາມາດເຊື່ອມໂຍງກັບຂະແໜງການທີ່ກ່ຽວຂ້ອງທັງພາຍໃນແລະ ສາກົນ.

            ທັງນີ້, ກໍ່ເພື່ອໃຫ້ການຈັດຕັ້ງປະຕິບັດວຽກງານໃຫ້ມີການຫັນປ່ຽນໃໝ່ທີ່ຕັ້ງໜ້າດີຂຶ້ນກວ່າເກົ່າ ເຮັດໃຫ້ຄະນະພັກ, ສະມາຊິກພັກມີຄວາມປອດໃສ, ເຂັ້ມແຂງ, ໜັ້ກແໜ້ນ.

ຂ່າວ: ອາພັດສະລາ

ພາບ/ຂ່າວ:
ວັນທີອອກຂ່າວ:
ວັນທີເກິດຂ່າວ:
Close Menu
Top