ລັດວິສາຫະກິດ ລາວບໍລິການສິນຄ້າຜ່ານແດນ ສ້າງແຜນກຳນົດພະນັກງານນຳພາ-ຄຸ້ມຄອງ

ໃນວັນທີ 27 ສິງຫາ 2018 ທີ່ລັດວິສາຫະກິດ ລາວບໍລິການສິນຄ້າຜ່ານແດນ (ລລບສ), ໄດ້ຈັດກອງປະຊຸມສ້າງແຜນກໍານົດພະນັກງານນໍາພາ-ຄຸ້ມຄອງຂຶ້ນ ໂດຍການເປັນປະທານຂອງທ່ານ ສີລາວຽງແກ້ວ ຮອງລັດຖະມົນຕີກະຊວງການເງິນ, ມີທ່ານ ຂັນທອງ ແກ້ວໄພທູນ ຮັກສາການຜູ້ອຳນວຍການໃຫຍ່ລັດວິສາຫະກິດ ລາວບໍລິການສິນຄ້າຜ່ານແດນ, ມີທ່ານ ບຸນທົງ ໝັ້ນອານົງ ຮອງກົມກວດກາກະຊວງການເງິນ, ມີຮອງຜູ້ອຳນວຍການ, ຫົວໜ້າພະແນກ, ຮອງພະແນກ ພ້ອມດ້ວຍສະມາຊິກພັກ ແລະ ພະນັກງານ ລລບສ ເຂົ້າຮ່ວມ.
ໃນກອງປະຊຸມ, ທ່ານ ບຸນທົງ ໝັ້ນອານົງ ໄດ້ສະເໜີມາດຕະການລວມ ແລະ ມາດຕະຖານສະເພາະຂອງພະນັກງານນໍາພາ-ຄຸ້ມຄອງ ແລະ ແນະນຳວິທີການຂຽນບັດທາບທາມໃຫ້ພະນັກງານ ລລບສ ເປັນຕົ້ນແມ່ນການປະເມີນຜົນສຳເລັດໃນການການປະຕິບັດໜ້າທີ່ວຽກງານໃນປັດຈຸບັນ, ບັນຫາທີ່ຄົງຄ້າງໃນໄລຍະຜ່ານມາ ແລະ ວິທີການແກ້ໄຂສະເພາະໜ້າ ແລະ ຕໍ່ໜ້າເພື່ອຮັບປະກັນເຮັດໃຫ້ວຽກງານສຳເລັດຕາມລະດັບຄາດໝາຍ.
ໂອກາດດຽວກັນ, ທ່ານ ສີລາ ວຽງແກ້ວ ຮອງລັດຖະມົນຕີກະຊວງການເງິນ ໄດ້ແນະນຳໃຫ້ພະນັກງານຫຼັກແຫຼ່ງ ແລະ ສະມາຊິກພັກ ລລບສ ຄັດເລືອກ ແລະ ເລືອກເຟັ້ນເອົາພະນັກງານນໍາພາ-ຄຸ້ມຄອງແນໃສ່ຮັບປະກັນລັກສະນະສືບທອດປ່ຽນແທນສະເພາະໜ້າ ແລະ ຍາວນານ, ເພື່ອຕອບສະໜອງທາງດ້ານຈຳນວນ ແລະ ຄຸນນະພາບໂຄງປະກອບສ້າງດ້ານບຸກຄະລາກອນຕ້ອງເປັນຄົນທີ່ມີຫຼັກໝັ້ນທາງດ້ານແນວຄິດ-ການເມືອງ, ມີແບບແຜນວິທີເຮັດວຽກ ແລະ ຢຶດໝັ້ນລວມສູນປະຊາທິປະໄຕ ເຫັນແກ່ປະໂຫຍດສ່ວນລວມຫຼາຍກ່ວາປະໂຫຍດສ່ວນຕົວ ຈຸ້ມເຈື້ອເຊື້ອສາຍ ແລະ ອື່ນໆ ທີ່ຈະສ້າງຜົນເສຍຫາຍຕາມມາໃຫ້ແກ່ອົງກອນຂອງຕົນ.
ສະນັ້ນ, ໃນການເລືອກເອົາພະນັກງານນໍາພາຄຸ້ມຄອງຕ້ອງມີຄຸນທາດການເມືອງໜັກເເໜ້ນ, ມີແບບແຜນ ແລະ ວິທີການໃນການບໍລິຫານວຽກງານທີ່ເປັນຍຸດທະສະສາດ ແລະ ມີລັກສະນະວິທະຍາສາດ, ມີຄວາມຮູ້ຄວາມສາມາດເພື່ອນຳພາສະມາຊິກພັກ ແລະ ພະນັກງານ-ລັດຖະກອນເຮັດວຽກງານການເມືອງ ແລະ ວຽກງານວິຊາສະເພາະໃຫ້ສຳເລັດເປັນກ້າວໆ.
ກອງປະຊຸມຄັ້ງນີ້, ຍັງໄດ້ມີການປ່ອນບັດຄັດເລືອກເອົາພະນັກງານສືບທອດປ່ຽນແທນຕາມມາດຕະຖານ ລວມ ແລະ ມາດຕະຖານສະເພາະທີ່ໄດ້ກຳນົດໄວ້ແລ້ວນັ້ນເພື່ອເກັບຂໍ້ມູນເບື້ອງຕົ້ນໃນການຊັບຊ້ອນ ແລະ ຈັດວາງພະນັກງານນໍາພາ-ຄຸ້ມຄອງເຂົ້າໃນຕຳແໜ່ງທີ່ເໝາະສົມແຕ່ລະຂັ້ນ.

ພາບ/ຂ່າວ:

 ຫັດທະພອນ

ວັນທີອອກຂ່າວ:

31/08/2018

ວັນທີເກິດຂ່າວ:

27/08/2018

Close Menu
Top