an image an image

ສະຖານີຄ່ຽນຖ່າຍສິນຄ້າທີ່ດ່ານພາສີສາກົນບໍ່ເຕັນ ເປີດນຳໃຊ້ເປັນທາງການ

pulpit rock
ສະຖານີບໍລິການຄ່ຽນຖ່າຍສິນຄ້າ ຂອງບໍລິສັດ ລາວສາກົນ ໄອຊີດີ ຈຳກັດ, ທີ່ໃຫ້ບໍລິການຍົກຍໍຄ່ຽນຖ່າຍສິນຄ້ານໍາເຂົ້າ-ສົ່ງອອກພາຍໃນ ແລະ ຕ່າງປະເທດ, ບໍລິການຫຸ້ມຫໍ່, ບໍລິການຈັດພິມເອກະສານ ອາຊິກູດາ, ຊຳລະຄ່າພາສີອາກອນຕ່າງໆທີ່ຜ່ານດ່ານພາສີສາກົນບໍ່ເຕັນ ແຂວງຫລວງນ້ຳທາ, ໄດ້ເປີດນຳໃຊ້ເປັນທາງການ, ພ້ອມທັງໄດ້ວາງວິໄສທັດຈະສ້າງໃຫ້ບໍລິສັດໃຫ້ກາຍເປັນອົງກອນຕົວແບບໃນດ້ານໂລຈິສ໌ຕິ ແລະ ກາຍເປັນຈຸດລວມສູນລະບົບສາງໃຫ້ການບໍລິການໄດ້ມາດຕະຖານສາກົນ.
ພິທີດັ່ງກ່າວໄດ້ຈັດຂຶ້ນໃນວັນທີ 28 ມີນາ 2018 ຜ່ານມາ, ທີ່ດ່ານພາສີສາກົນບໍ່ເຕັນ ແຂວງຫລວງນ້ຳທາ, ໂດຍການເປັນກຽດເຂົ້າຮ່ວມຂອງທ່ານ ສົມດີ ດວງດີ ຮອງນາຍົກລັດຖະມົນຕີ ລັດຖະມົນຕີກະຊວງການເງິນ, ມີທ່ານ ເພັດຖາວອນ ພິລາວັນ ເຈົ້າແຂວງໆຫລວງນ້ຳທາ, ທ່ານ ນາງ ສຸວັນເພັງ ບຸບຜານຸວົງ ລັດຖະມົນຕີປະຈຳສຳນັກງານນາຍົກລັດຖະມົນຕີ, ມີຮອງລັດຖະມົນຕີກະຊວງໂຍທາທິການ ແລະ ຂົນສົ່ງ, ຮອງເຈົ້າແຂວງ, ປະທານສະພາບໍລິຫານຜູ້ຖືຮຸ້ນບໍລິສັດ ລາວສາກົນ ໄອຊີດີ ຈຳກັດ, ຫົວໜ້າຫ້ອງວ່າການປົກຄອງແຂວງຫລວງນໍ້າທາ ແລະ ຕາງໜ້າຈາກຂະແໜງການກ່ຽວຂ້ອງແຂວງຫລວງນໍ້າທາ ແລະ ແຂວງບໍ່ແກ້ວເຂົ້າຮ່ວມ.
ທ່ານ ນາງ ທູນສະຫວັນ ສີຈັນທອງທິບ ປະທານສະພາບໍລິຫານຜູ້ຖືຮຸ້ນບໍລິສັດ ລາວສາກົນ ໄອຊີດີ ຈຳກັດ ກ່າວວ່າ: ອີງໃສ່ການພັນທະນາ ແລະ ຄວາມຮຽກຮ້ອງຕ້ອງການໃນການເຊື່ອມໂຍງ ການເຊື່ອມຈອດທາງດ້ານໂຄງລ່າງຄົມມະນາຄົມຂົນສົ່ງ ແລະ ເສດຖະກິດກັບບັນດາປະເທດໃກ້ຄຽງ ແລະ ພາກພື້ນຈຶ່ງມີຄວາມຈໍາເປັນໃນການພັດທະນາ ການບໍລິການດ້ານການຂົນສົ່ງຂອງ ສປປ ລາວ ໃຫ້ສອດຄ່ອງກັບນະໂຍບາຍຂອງພັກ ແລະ ລັດຖະບານໃນການຫັນປະ ເທດທີ່ບໍ່ມີຊາຍແດນຕິດກັບທະເລ ໃຫ້ກາຍເປັນປະເທດບໍລິການທາງຜ່ານດ້ານຄົມມະນາຄົມຂົນສົ່ງຢ່າງມີປະສິດທິຜົນຈຶ່ງສາມາດສ້າງລາຍຮັບຈາກການລົງທຶນອັນມະຫາສານໃສ່ໂຄງລ່າງພື້ນຖານໄດ້. ບໍ່ດັ່ງນັ້ນ, ລົດຂົນສົ່ງຂອງປະເທດໃກ້ຄຽງຈະຜ່ານດິນແດນພວກເຮົາໄປລ້າໆໂດຍທີ່ພັກລັດຖະບານ ຕ້ອງໄດ້ແບກຫາບພາລະອັນໃຫຍ່ຫລວງໃນການບູລະນະຮັກສາໂຄງລ່າງດັ່ງກ່າວ.
ການສ້າງຕັ້ງບໍລິສັດ ລາວສາກົນ ໄອຊີດີ ຈຳກັດ (Lao International ICD Co.Ltd) ໄດ້ໃຊ້ເວລາໃນການກະກຽມທັງໝົດປະມານ 16 ເດືອນ ແລະ ບໍລິສັດພວກເຮົາປະກອບດ້ວຍ 3 ຂາຮຸ້ນຫລັກຈາກສປປ ລາວ ແລະ ສປຈີນທີ່ມີປະສົບການດ້ານການບໍລິການໂລຈິສ໌ຕິກຫລາຍກ່ວາ 20 ປີຄື: ບໍລິສັດ ຂົນສົ່ງສາກົນ ຈຳກັດ; ລັດວິສາຫະກິດລາວບໍລິການສິນຄ້າຜ່ານແດນ ແລະ ບໍລິສັດ ລາວບໍ່ເຕ່ນຂາອອກ-ຂາເຂົ້າຈຳກັດຂອງ ສປ ຈີນ ຈຸດປະສົງເພື່ອເປັນການອຳນວຍຄວາມສະດວກໃຫ້ແກ່ການຂົນສົ່ງຂ້າມແດນໃຫ້ມີຄວາມຄ່ອງຕົວ, ສະດວກ, ປອດໄພ, ໂປ່ງໃສ ແລະ ທີ່ສຳຄັນທີ່ສຸດແມ່ນຫລຸດຄ່າຂົນສົ່ງເພາະສາມາດເຮັດໃຫ້ມີການຂົນສົ່ງທັງຂາໄປ ແລະ ຂາກັບ, ຊຶ່ງເປັນປັດໄຈໃນການດຶງດູດການລົງທຶນຂອງຕ່າງປະເທດເຂົ້າມາສປປ ລາວ ໃຫ້ຫລາຍຂຶ້ນ.
ໂດຍປະຕິບັດຕາມສັນຍາຂົນສົ່ງຂ້າມແດນຂອງອະນຸພາກພື້ນແມ່ນໍ້າຂອງ ຫລື GMS CBTA ຊຶ່ງໄດ້ກຳນົດໃຫ້ເຈົ້າຂອງປະເທດຖືຮຸ້ນຫລາຍກ່ວາເຄິ່ງໜຶ່ງຂອງຈຳນວນຮຸ້ນທັງໝົດ .ສະນັ້ນ 2 ບໍລິສັດຂອງລາວເຮົາຈຶ່ງຖືຮຸ້ນ 51 ສ່ວນຮ້ອຍ ແລະ ບໍລິສັດລາວບໍ່ເຕ່ນຂາອອກ-ຂາເຂົ້າຈຳກັດຂອງຈີນຖືຮຸ້ນ 49 ສ່ວນຮ້ອຍ ແລະ ໄດ້ປະກອບມູນຄ່າການລົງທຶນທັງໝົດ 14 ລ້ານໂດລາສະຫະລັດ.
ສະຖານີຄ່ຽນຖ່າຍສິນຄ້າມີເນື້ອທີ່ທັງໝົດ 22,3 ເຮັກຕາ, ໃນນັ້ນໄດ້ພັດທະນາໄລຍະທີ 1 ຊຶ່ງມີຈໍານວນ 9 ເຮັກຕາຊຶ່ງໄດ້ພັດທະນາໃຫ້ເປັນ ໄອຊີດີ ທີ່ໄດ້ມາດຕະຖານສາກົນມີພື້ນຖານໂຄງລ່າງ, ພາຫະນະ, ອຸປະກອນ, ຄຸ້ມຄອງດ້ວຍລະບົບໄອທີ, ລະບົບເອຊີກຸດະ (ASYCUDA) ຂອງກົມພາສີ ແລະ ສິ່ງອຳນວຍຄວາມສະດວກຄົບວົງຈອນດຳເນີນທຸລະກິດດັ່ງນີ້: ໃຫ້ການບໍລິການຮັບ ແລະ ສົ່ງສິນຄ້າ ທັງພາຍໃນ ແລະ ຕ່າງປະເທດ ໂດຍຜ່ານບັນດາຄູ່ສັນຍາ ຕົ້ນທາງ, ປາຍທາງ ແລະ ສາຍເຮືອໃນການບໍລິການຂົນສົ່ງໃຫ້ເຖິງເປົ້າໝາຍ; ໃຫ້ການບໍລິການເຕົ້າໂຮມ ແລະ ແຈກຢາຍສິນຄ້າໂດຍການເປັນສູນໂລຈິສ໌ຕິກຂອງພາຍໃນປະເທດ ແລະ ລະຫວ່າງປະເທດເຮັດໃຫ້ມີສິນຄ້າທັງຂາໄປ ແລະ ຂາກັບສາມາດຫລຸດຜ່ອນລາຄາຂົນສົ່ງໄດ້ຢ່າງມີປະສິດທິຜົນ; ໃຫ້ການບໍລິການຍົກຍໍ-ຄ່ຽນຖ່າຍສິນຄ້າດ້ວຍເຄື່ອງກົນຈັກພາ ຫະນະທີ່ທັນສະໄໝຫລຸດຜ່ອນການຍົກຍໍຄ່ຽນຖ່າຍດ້ວຍແຮງງານຄົນ, ຫລຸດຜ່ອນເວລາເຮັດໃຫ້ປະສິດທິພາບວຽກສູງຂຶ້ນ; ໃຫ້ການບໍລິການຝາກສາງໂດຍມີສາງສິນຄ້າທີ່ເປັນລະບົບທັງສາງເປີດ-ສາງປິດ ແລະ ສິນຄ້າອັນຕະລາຍໂດຍນໍາໃຊ້ລະບົບການກວດກາ ແລະ ລະບົບໄອທີທັນສະໄໝ; ໃຫ້ການບໍລິການແຈ້ງພາສີ, ເອກະສານຂົນສົ່ງຜ່ານແດນແລະ ບໍລິການຈັດສົ່ງສິນຄ້າທາງບົກລະຫວ່າງປະເທດ;ໃຫ້ບໍລິການບັນຈຸຫຸ້ມຫໍສິນຄ້າກ່ອນການນໍາເຂົ້າແຈກຢາຍພາຍໃນ ແລະ ສົ່ງອອກສິນຄ້າໄປຍັງປະເທດທີສາມ, ກວດສອບຄຸນນະພາບສິນຄ້າເຊັ່ນ: ວັດສະດຸກໍ່ສ້າງ, ວັດຖຸມີພິດ, ສານເຄມີ, ວັດຖຸອັນຕະລາຍ, ບໍລິການຂົນສົ່ງສິນຄ້າລະຫວ່າງປະເທດ ແລະ ຜ່ານແດນດ້ວຍຕູ້ຄອນເທັນເນີ, ບໍລິການສ້ອມແປງ ແລະ ທຳຄວາມສະອາດຕູ້ຄອນເທັນເນີພາຍໃນ, ຕູ້ຂອງສາຍເຮຶອ ແລະ ບໍລິການອື່ນໆທີ່ຕິດພັນກັບວຽກງານການຂົນສົ່ງ (ໂລຈິສ໌ຕິກ).
ສະຖານີບໍລິການຄ່ຽນຖ່າຍສິນຄ້າຂອງບໍລິສັດ ລາວສາກົນ ໄອຊີດີ ຈຳກັດ ຕັ້ງຢູ່ທີ່ເຂດດ່ານພາສີສາກົນບໍ່ເຕັນແຂວງຫລວງນ້ຳທາ, ໂດຍນຳໃຊ້ເນື້ອທີ່ດິນແບ່ງອອກຈາກເຂດພັດທະນາເສດຖະກິດສະເພາະບໍ່ເຕ່ນແດນງາມ, ມີກຳນົດອາຍຸຂອງສັນຍາເປັນເວລາ 28 ປີ (2018-2045) ແລະ ສາມາດຕໍ່ສັນຍາໄດ້ບົນພື້ນຖານການເຫັນດີທັງສອງຝ່າຍ, ມີທຶນຈົດທະບຽນເບື້ອງຕົ້ນທັງໝົດ 14,5 ລ້ານໂດລາສະຫະລັດ ຫລື ປະມານ 120 ຕື້ກວ່າກີບ.
ທ່ານ ປະທານສະພາບໍລິຫານຜູ້ຖືຮຸ້ນບໍລິສັດ ລາວສາກົນ ໄອຊີດີ ຈຳກັດ ກ່າວຕື່ມວ່າ: ການສ້າງຕັ້ງບໍລິສັດ ລາວສາກົນ ໄອຊີດີ ຈຳກັດ ໂດຍປະຕິບັດຕາມທິດຊີ້ນຳຂອງລັດຖະບານ ແລະ ແຈ້ງການຂອງຫ້ອງວ່າການສຳນັກງານນາຍົກລັດຖະມົນຕີ ສະບັບເລກທີ 591/ຫສນຍ.ກລຂ ລົງວັນທີ 12 ເມສາ 2017, ກະຊວງການເງິນໄດ້ອອກຂໍ້ຕົກລົງ ສະບັບເລກທີ 2721/ກງ ລົງວັນທີ 14 ສິງຫາ 2017 ແລະ ຂໍ້ຕົກລົງຂອງເຈົ້າແຂວງ ສະບັບເລກທີ 506/ຈຂ ລົງວັນທີ 24 ສິງຫາ 2017 ວ່າດ້ວຍການແຕ່ງຕັ້ງຄະນະວິຊາການ ເພື່ອປະສານເຮັດວຽກຮ່ວມກັນກັບບໍລິສັດຄູ່ຮ່ວມພັດທະນາ, ພ້ອມທັງດຳເນີນການຕາມຂັ້ນຕອນ, ລະບຽບການ ແລະ ກົດໝາຍທີ່ກ່ຽວຂ້ອງໃນການເໜີສ້າງຕັ້ງບໍລິສັດໃນຮູບແບບຮ່ວມທຶນລະຫວ່າງພາກລັດ ແລະ ພາກບໍລິສັດເອກະຊົນຢູ່ທີ່ເຂດດ່ານພາສີສາກົນບໍ່ເຕັນຢູ່ຕິດກັບເຂດເສດຖະກິດພິເສດບໍ່ເຕ່ນແດນງານແຂວງຫລວງນ້ຳທາ.
ມາຮອດປັດຈຸບັນສະຖານີບໍລິການຄ່ຽນຖ່າຍສິນຄ້າຂອງບໍລິສັດ ລາວສາກົນ ໄອຊີດີ ຈຳກັດ ພ້ອມທີ່ຈະໃຫ້ບໍລິການເຕັມຮູບແບບ, ຄຽງຄູ່ກັນນີ້, ທາງບໍລິສັດຍັງໄດ້ວາງວິໄສທັດຈະສ້າງໃຫ້ບໍລິສັດໃຫ້ກາຍເປັນອົງກອນຕົວແບບໃນດ້ານໂລຈິສ໌ຕິ, ສ້າງໃຫ້ເປັນອົງກອນມີຄຸນນະທຳ, ຈັນຍາບັນ ແລະ ສ້າງຄວາມເພິ່ງພໍໃຈຂອງລູກຄ້າໃຫ້ກາຍເປັນວັດທະນະທຳຂອງອົງກອນ, ສ້າງໃຫ້ເປັນຈຸດລວມສູນລະບົບສາງໃຫ້ການບໍລິການໃນການກະຈ່າຍສິນຄ້າ, ດຳເນີນທຸລະກິດໄດ້ມາດຕະຖານສາກົນ, ບໍລິການວ່ອງໄວປອດໄພທັນສະໄໝ ແລະ ໄດ້ມາດຕະຖານສາກົນໂດຍການນຳໃຊ້ເທັກໂນໂລຊີການໃຫ້ບໍລິການດ້ານໂລຈິສ໌ຕິກແບບຄົບວົງຈອນ ແລະ ເປັນທີ່ຍອມຮັບຂອງສັງຄົມ ແລະ ສາກົນ.
ຂ່າວ-ພາບ: ກະຊວງການເງິນ

ວັນທີອອກຂ່າວ: 
30/03/2018
ວັນທີ່ເກີດຂ່າວ: 
28/03/2018
ພຸດ, 28 ມີນາ, 2018 - ອາທິດ, 28 ມີນາ, 2021
ເອກະສານຂະໜາດ
a821.jpg306.71 KB

ຜູ້ໃຊ້ ເຂົ້າໃຊ້ລະບົບ

ອັດຕາແລກປ່ຽນ

ສະກຸນເງິນ
ຊື້
ຂາຍ
USD 8,308 8,313
THB 265.16 267.15
EUR 10,197 10,248
JPY 76.69 78.22
VND 0.3638   0.3711
ລາຍງານໂດຍ ທະນາຄານແຫ່ງ ສປປລາວ
ວັນທີ 02/04/2018

Counter

  • ຜູ້ເຂົ້າຊົມທັງໝົດ = 31,319,717
  • ເລີ້ມຕັ້ງແຕ່ = 20/03/2009

ປະຕິທິນ

1
 
2
 
3
 
4
 
5
 
6
 
7
 
8
 
9
 
10
 
11
 
12
 
13
 
14
 
15
 
16
 
17
 
18
 
19
 
20
 
21
 
22
 
23
 
24
 
25
 
26
 
27
 
28
 
29
 
30
 
31